ازّح.. ازّح... ازّح... ازّحات

ازّح.. ازّح... ازّح... ازّحات

    تونس اليوم.. ناس تعدي في الامتحانات.. وناس تتجرع في المحنات... و في التأسيسي طبّالة وحنّانات.. يخربشو شوية في الدستور حسب النفحات.. و"أولادنا" يهرسو في الحانات..  ومعارضة تتلوصق على الكراسي وزعمة زعمة مقترحات.. ومُنظّرين تخميرة وشطحات.. وناس مازال ساترها (نحبك يا شعب) متاع فرحات.. وجروح الثورة صارت تقيحات.. وحكومة ضاربة عراجن د ڤلة ومنّت على الشعب ببلحات.. وبقايا التجمع تثاوبت واصحات.. ورئيس البلاد خدمتو الراحات.. وأدمينات الفايس بوك لعيون الحكومة ينقشو في مسرحيات.. وميليشيات في النهار تكفّر وتكوّر وفي الليل عندها على مقرات الأعداء سرحات.. ووزاء على نِسب النمو يكذبو والحشمة منهم اتنحّات.. وراس الشعب بوّط بعد اللي وعود التشغيل طلعت أم الزلعات.. حكومة سرادك ساقيها في الغرم وآذان وصياحات.. ومناصرين ز نڤة ز نڤة وشوارع وساحات..  ينشدو ديكي ديكي أنت صديقي يا مناصر اللحيات.. وإذا تقول ثورة كرامة يقلك ايعيشو ربيع الثورات.. يا صفر فاصل يا اللي نساكم عورات.. يا كفّار يا فجّار يا مناجل ومطرقات.. وشعر وكفر وموسيقى ولوحات..

آه يا تونس قداش اتكرر واتجيب مبروكة عليك الفتوحات.. مبروكة عليك منوبة و المنڤالة وكل الغزوات.. مبروك عليك اللي مازال عندو أمل في الشيخات والنصبات.. مبروك عليك فكر الهزات والنفضات.. مبروك عليك إعلام امبهّم في النشرات..  تلافز وإذاعات ومحطات.. مبروكة عليك المسيرات والاعتصامات.. مبروك عليك الواعيين والواعيات.. وشيوخ الطهارة وإرضاع الكبير اللي استقبالهم تكبيرات.. واحترامي للموزات والشيخات.. والقرضاوي في شتاء بارد قالو الثورة تحت ضبوطو ادّفات.. مبروك يا تونس الكلاسط والصبابط والشلاكات.. مبروك عليك جعفور الحوات..

      و ازّح.. ازّح... ازّح... مفرد ازّحات

     وأنا مواطن رصّات كي بوعشة ومعيزات.. وين يطيح الهم انبات.. ثورة وإلا عورة ظاهرلي تونس بعض البورديلات..

ويا من صرختم يوما:"الشعب يريد" لكم من أحمد مطر مجمل الخطابات:

السلاطين كلاب .. السلاطين كلاب
إشتموا منذ حلول الليل حتى الفجر
لن يهتز كرسى ولن ينهار باب

السلاطين كلاب
هذه الأوساخ لا يندى لها بالسب وجه أبدًا
فاحترموا وجه السباب !

السلاطين كلاب
عبثـًا ..
إن البغايا ليس يخجلن
إذا سميتموهن "قِحاب" !

السلاطين كلاب
ويْحَكم .. كفوا
فأنتم لا تهينون السلاطين بهذا الوصف
بل أنتم تهينون الكلاب
أطبقوا أفواهكم
يا من تنامون على صحوة ظفر
وتفيقون على يقظة ناب

وأسمعوا فصل الخطاب :
السلاطين دُمى من ورق
فوق عروش من ورق
تحت النفط اندلق
بدلاً من أن تلعنوهم
.. أشعلوا عود ثقاب !