lundi 27 décembre 2010

المقهور

       
المقهور
تواصلا مع ما عقدنا العزم عليه من الحديث عن بعض الوجوه قررنا اليوم الكتابة عن المقهور ولأنّا وجدنا في ما كتبه أحمد مطر ما يعبّر عمّا رمنا الخوض فيه قرّرنا صمت النثر لصوت الشعر فإليكم القصيدة:
 
أيها العصفور الجميل..أريد أن أصدح بالغناء مثلك، وأن أتنقّل بحرية مثلك.
قال العصفور:
-لكي تفعل كل هذا، ينبغي أن تكون عصفوراً مثلي..أأنت عصفور ؟
- لا أدري..ما رأيك أنت ؟
-إني أراك مخلوقاً مختلفاً . حاول أن تغني وأن تتنقل على طريقة جنسك .
- وما هو جنسي ؟
- إذا كنت لا تعرف ما جنسك ، فأنت، بلا ريب، حمار .
***
- أيها الحمار الطيب..أريد أن أنهق بحرية مثلك، وأن أتنقّل دون هوية أو جواز سفر، مثلك .
قال الحمار :
- لكي تفعل هذا..يجب أن تكون حماراً مثلي . هل أنت حمار ؟
- ماذا تعتقد ؟
- قل عني حماراً يا ولدي، لكن صدّقني..هيئتك لا تدلُّ على أنك حمار .
- فماذا أكون ؟
- إذا كنت لا تعرف ماذا تكون..فأنت أكثر حمورية مني ! لعلك بغل .
***
- أيها البغل الصنديد..أريد أن أكون قوياً مثلك، لكي أستطيع أن أتحمّل كل هذا القهر،
وأريد أن أكون بليداً مثلك، لكي لا أتألم ممّا أراه في هذا الوطن .
قال البغل :
- كُـنْ..مَن يمنعك ؟
- تمنعني ذلَّتي وشدّة طاعتي .
- إذن أنت لست بغلاً .
- وماذا أكون ؟
- أعتقد أنك كلب .
***
- أيها الكلب الهُمام..أريد أن ا طلق عقيرتي بالنباح مثلك، وأن أعقر مَن يُغضبني مثلك .
- هل أنت كلب ؟
- لا أدري..طول عمري أسمع المسؤولين ينادونني بهذا الاسم، لكنني لا أستطيع النباح أو العقر .
- لماذا لا تستطيع ؟
- لا أملك الشجاعة لذلك.. إنهم هم الذين يبادرون إلى عقري دائماً .
- ما دمت لا تملك الشجاعة فأنت لست كلباً .
- إذَن فماذا أكون ؟
- هذا ليس شغلي..اعرف نفسك بنفسك..قم وابحث عن ذاتك .
- بحثت كثيراً دون جدوى .
- ما دمتَ تافهاً إلى هذا الحد..فلا بُدَّ أنك من جنس زَبَد البحر .
***
- أيُّها البحر العظيم..إنني تافه إلى هذا الحد..انفِني من هذه الأرض أيها البحر العظيم .
احملني فوق ظهرك واقذفني بعيداً كما تقذف الزَّبَد .
قال البحر :
- أأنت زَبَد ؟
- لا أدري..ماذا تعتقد ؟
- لحظةً واحدة.. دعني أبسط موجتي لكي أستطيع أن أراك في مرآتها.. هـه..حسناً، أدنُ قليلاً .
أوووه..اللعنة..أنت مواطن عربي !
- وما العمل ؟
- تسألني ما العمل ؟! أنت إذن مواطن عربي جداً . بصراحة.. لو كنت مكانك لانتحرت .
- ابلعني، إذن، أيها البحر العظيم .
- آسف..لا أستطيع هضم مواطن مثلك .
- كيف أنتحر إذن ؟
- أسهل طريقة هي أن تضع إصبعك في مجرى الكهرباء .
- ليس في بيتي كهرباء .
- ألقِ بنفسك من فوق بيتك .
- وهل أموت إذا ألقيت بنفسي من فوق الرصيف ؟!
- مشرَّد إلى هذه الدرجة ؟! لماذا لا تشنق نفسك ؟
- ومن يعطيني ثمن الحبل ؟
- لا تملك حتى حبلاً ؟ اخنق نفسك بثيابك .
- ألا تراني عارياً أيها البحر العظيم ؟!
-اسمع..لم تبقَ إلاّ طريقة واحدة . إنها طريقة مجانية وسهلة، لكنها ستجعل انتحارك مُدويّاً .
- أرجوك أيها البحر العظيم.. قل لي بسرعة..ما هي هذه الطريقة؟
- إ بقَ حَيّـا!

lundi 20 décembre 2010

 حڤرة

     حڤرة

تو باهي هكا الواحد يعمل دورة العالم باش يعرف اللي صاير في بلادو؟ معقول ندفعو مع كل فاتورة ضو فلوس للتلفزة الوطنية باش ما تتحدثش على اللي يوقع في البلاد؟ وإذا تحدثت باش ما تجيبش الصحيح؟ معقول ندفعو فلوس لمشغل الانترنيت والتليكوم باش بعدين نلقاو أكثر المواقع محجوبة؟ معقول نسمعو في أرقام ومراتب أولى بين الدول في العالم واحنا كل شوية عندنا مشكلة في البلاد متاع بطالة وحرقة وانتحار؟ معقول مدرب متاع كورة ياخذ ثلاثين مليون في الشهر أي النهار بمليون والشباب بشهادات جامعية تضرب فيه الحيوط؟ معقول قبل أسبوعين نقراو أنو العام هذا عندنا فائض في إنتاج المحروقات ومباشرة بعدها نزيدو في أسعار نفس المحروقات؟ معقول تحية العلم في القسم كأنو الواحد حاشم من نشيد بلادو؟ ومعقول...........؟

صرت خايف أني نكمل كيف الرحالة هذا متاع القصة:

دخل رجل بلدة فأعجبه ما فيها ثم زار مقبرتها فقرأ على أحد شواهدها هذا قبر فلان ألف كتاب كذا وكان عالما فاضلا ومات وعمره يومان. و رأى على قبر أخر هذا قبر فلان القائد العظيم الذي انتصر في موقعة كذا ومات وعمره ثلاثة أيام. وهذا قبر فلان الفنان الكبير وقد مات وعمره يوم واحد فعجب الرحالة لذلك كله وتوجه إلى خبير بالبلدة وسأله عن هذا اللغز الذي لم يفهمه فقال :إننا لا نعد من أيام حياتنا إلا الأيام السعيدة فقال الرحالة :إنني أود أن أموت ببلدكم و أرجو أن تكتبوا على قبري هذا :هذا رحالة جاب الأقطار وجاب الأمصار ومات قبل أن يولد.

jeudi 16 décembre 2010

وين ما شيين15

      
قال الراوي
 أنو في زمان موش قديم برشا بالضبط قبل ما يجي الفايس بوك
كانو ناس في بلاد معروفة برا قول بالخضراء وإلا الفرح الدائم وإلا بتخديم المخ وإلا بالكفتاجي أو ربع دجاج لمن استطاع إليه سبيلا المهم الناس في البلاد هاذي مغرومين بكل شيء جديد أو قديم غسلوه وشللوه ورجعوه جديد
أيا قول القديم والجديد عايشين مع بعض صحيح أنهم موش طايقين بعضهم لكنهم كانو يحكيو وساعات يتعاركو وساعات يسكتو وساعات كل واحد ينبر على الآخر لكن كان كل اللي يصير يوقع وهما في وجوه بعضهم وهكا ما كان يتكلم منهم كان اللي عندو ما يقول في روحو باش الآخر ما يهنتلوش .....
حتى جاء نهار وظهر الفايس بوك
اقترح الفايس بوك حاجة اسمها الصداقة الافتراضية تنجم تقول لعبة فيها نحب ونتقاسم ونعلق ونعمل مجموعة.. بالمختصر ايجا نتلمو ونحكيو مع بعضنا يعني نتفاعلو (موش بالمعنى اللي فكرت فيه حضرتك...  ما أخيب نيتك)
أيا سيدي ويا للا برشا ناس حبو الفكرة وبداو يجمعو في (الأصدقاء) وبدا العد 1-2-3-........ برشا.. وصار سوق ودلاّل اللي باسمو الحقيقي واللي عامل بسودو واللي جاي من برا واللي عايش في البلاد وبدا الجو هات يا أغاني ويا فيديوهات ويا حكم ويا صباح الخير وأنا مشيت عملت صحفة لبلابي وأنا داخل للتوالات يعني ما خلاو ما كتبو وزادو تصاور يعني كل شيء صار بالمكشوف (موش متاع حنبعل) وهكا  بعد مديدة قصيرة فهمو برشا عباد أنو الفايس بوك فضاء متاع استقطاب متاع استقواء متاع برنامج انتخابي متاع مشرع شهرة متاع نكرّهك في حياتك متاع نمحيك من الوجود متاع نفضحك متاع نحيلك الجنسية متاع نحيلك والديك متاع نفضحك نمرمدك نغسلك نشللك يا مايع يا ماسوني يا خوانجي يا بنفسجي يا فاسد يا كافر يا متخلف يا رجعي وبدات أفعال كيما نحجبك ونفشفشك ونصرفقك ووقتاها بداو برشا ناس يتفاعلو (لكن المرة هاذي بالمعنى الخايب للكلمة)  وصار الفايس بوك إمّا لوح في لوح كيما تونس7 كل شيء يتعاود كيما الأخبار المحلية أو القضية الفلسطينية وإلا نحي شوشتك من ايدي ضرب ومضروب.
وجاء عمّار وصار ساكن في برشا فايسبوكيين يسبوه ويخدمو في خدمتو الله يبارك
صحيح أنو قلنا من قبل اللي القديم والجديد كانو يتعاركو لكن قلنا العرك كان بين الصحاح ولكن الفايس بوك حل اللعبة للمفرخ وصار كل من هب ودب ينظّر ويحكي ويهدد وطاح القدر وهبط المستوى بل أنو معجبوش الهبوط صار يحفر باش يزيد يغرق وهاذي بعض حالنا وأحوالنا ووين ماشيين؟   

lundi 6 décembre 2010

قلق ليكس كيما ويكيليكس

قلق ويكس كيما ويكيليكس 

وثيقة تكشف عن حوار دار بين عمّار 404 وعمّار الأكبر رئيسه المباشر:
عمّار الأكبر:تصور أني اكتشفت اليوم أنّ تاريخ صلوحيتك انتهى!
عمّار 404 : علاش عرفي ياخي أنا حكة طماطم وإلا باكو حليب؟
عمّار الأكبر : لأني البارح اكتشفت أنّ ابني صار مشاغب هل من تفسير يا عمّار
عمّار 404: لا يا عرفي ما نعرفش
عمّار الأكبر: لأنّو وصل لمرحلة البلوغ يا سي عمّار
عمّار 404: وأنا شنوة ذنبي
عمّار الأكبر:  وتسأل زادة كيفاش ما تصنصرش البلوغ متاع ولدي باش يريض
عمّار 404: هذاكا بُلُوغ موش Blog
عمّار الأكبر:صنصر ما يهمنيش 

وثيقة تم تسريبها بين قفّاف1 وقفّاف آخر أثناء دورة تدريبية على من يسقط سرواله أسرع 

قفاف1: طلبو مني نزع السروال كاملا في المؤتمر الصحفي الذي التأم بالأمس أو تحويلي لكتابة التقارير السرية وهكا ما عادش نطلع في التلفزة أو تصنيفي ممّن لا يعول عليهم
       قفاف2: وشنوة عملت ؟
       قفاف1:الحقيقة قعدت حاير ..
       قفاف2:علاش تضيع فرصتك؟ غريبة فيك
      قفاف1:كان الاتفاق قبل المؤتمر أنّي أختار جملة من التالي نرددها 30مرات في  دقيقة  
      "الحال لاباس وكل ما يقال صيد في الماء العكر وراءه شرذمة ضالّة " ..
      "كل شيء متوفر والأسعار في المتناول غير لهفة المواطن
"ما عندناش رقابة على الانترنيت باستثناء المواقع الإباحية وإلا اللي تدعو وتشجع على الإرهاب
قفاف2: ايه وأنت شنوة اللي عملت؟
قفاف1: صلي على النبي قلت الجمل الكل في أقل من دقيقة كل وحدة 30 مرة كيما طلبوا
    قفاف2: يعني طرت بالبلاصة الله يهلكك المهم ما عندك وين واصل أنا ماشي تو نحي الشوت الدخلاني وتو نشوفك شنوة أنت تنجم تنحي بعدو