mercredi 21 août 2013

تغريدات اليوم: في زمن النهضة

   

      تغريدات اليوم في زمن النهضة.


v  أسعار العقار تُلهب جيب المواطن حيا وميّتا والبلدية ترفع رسوم القبور في عصر النهضة العار. أطلب من أهلي وأصدقائي حرق جثماني بعد موتي... النار ولا العار.

v  الحبيب اللوز يخشى العودة إلى السجون إذا سقطت النهضة يعني يجب أن تُخلّد النهضة في الحكم ليطمئن قلب سي اللوز ألا لعنة على الساقطين والمتساقطين والسواقط والسقّاط الذين سقطوا إلى عفن المؤامرات ودم من حوّلهم إلى سياسيين بعد أن كانوا من سقط المتاع.

v  إصدار بطاقة جلب دولية في حق زعيم أنصار الشريعة أبو عياض في قضية شكري بلعيد. دولية قالوا.... آه من الأكيد أنّه يوم كان أبو عياض في جامع الفتح الذي وقعت محاصرته يومها وخرج دون أن يلقي أحد عليه القبض تذكر المحاصرون أنّهم في فضاء إقليمي يحكمه رشودة الغنوشي وُلِد الخريجي. 

v  وزارة الداخلية تحمي كل من تجرأ وخالف النهضة وأبناءها المبشرين بثقافة جديدة والعدد في ازدياد. أخشى أن تصبح وزارة الداخلية وزارة حماية الشخصيات وتترك المواطن والوطن تحت حماية الأولياء الصالحين على حدّ تعبير الجنرال رشيد عمّار.  

v  وزير الثقافة من فرط عيشه مع الحيّات والثعابين في الحكومة المؤقتة ذهب إلى المستشفى للتداوي خشية أن تكون بيضة نصر الدين السهيلي التي رماه بها بيضة ثعبان ينفث سمّه وإن كان في البيضة. 

v  يبدو والله أعلم أنّ وزير التجارة رفّع في سعر معجون الطماطم حتى لا يقع استعماله في قذف الوزراء. فإذا كانت البيضة تنكسر حين تصيب الهدف فعلبة الطماطم تكسر الهدف حين تصيبه. 

v  قال علي لعريض: الحكومة ستتصدى لكل من يتطاول على مؤسسات الدولة! يقصد التصدي لمن عيّنتهم حركة النهضة في مختلف المسؤوليات في البلاد.. قبل أن (يضربني الزهايمر) هذا التهديد أليست ترجمته بكل حزم وقد سمعتها قبل 14 جانفي من شخص لقبه اليوم... المخلوع؟؟؟

v  إذا أردت استبدادا على الدوام فاخنق الإعلام. فبعد القبض على مراد المحرزي مصور اسطرلاب تي في  ها هي الشرطة تحاصر قناة الحوار للقبض على الطاهر بن حسين الذي كان أوّل من فتح قناته للجرذان. المواطنة ثقافة والنذالة طبع يا جرذان.

v  رفع النهضويون أربعة أصابع وأنزلوا الإبهام (إخفاء لبهامتهم). وباعتبار أنّ التونسي وسطي عادة أنزل أربعة أصابع ورفع لهم إصبع الوسط.

v  التونسي الحقيقي كطائر الفينيق ينتفض دوما من الرماد.. لا خوف عليك يا تونس ولاّدة الرجال. (تنويه: الرجال بمفهوم الرجولية كقيمة لا الذكورة بمفهوم الجنس. فبعض النساء أرقى. يقول الشيخ أبو الطيّب المتنبي:

ولوْ كانَ النّساءُ كمَنْ فَقَدْنا لفُضّلَتِ النّساءُ على الرّجالِ
وما التأنيثُ لاسمِ الشّمسِ عَيبٌ ولا التّذكيرُ فَخْرٌ للهِلالِ

dimanche 18 août 2013

ويين ماشيين29

 
  

ويين ماشيين؟

      طاح البول على الخرا قاله يا محلا ريحة الأحباب (شيوخ الحكومة والمعارضة)
وفردة ..و لقات أختها .... هكا نشوف المشهد في البلاد... حكومة ومعارضة.. واللي ما عجبوش عندو البحر يشرب منو كيما قالت وزيرة وأد المرأة أو يشرب من أيّ بول يختارو سخون وإلا بارد ووين ماشيين يا سي المواطن.. ناس في باردو (مع الضغط لكن مع مرور الأيام دون فعل حقيقي يصير ريق بارد موش باردو) وناس في القصبة (مع استبدال القاف عين طبعا) وناس تحكي على البلاد والفلسة (كأنو غراب أعور طاح بفولة مسوسة) وناس تحكي على اتحاد الشغل والتقصير (والليلة ليلة واضحك يا قنديل العروسة طويلة وباب الدار قصير) وناس تحكي على أرض الكنانة (ووضع الهانة ورقود الجبانة) وناس على الفايسبوك تنبر على السبسي السارف والغنوشي الخارف وكل من لحمو شارف (في تونس صرنا الخرا نعملولو مغارف) وناس معتصمة وناس بالوضع عاصمة وجبهة على القيادة متخاصمة والثورة عملولها جبيرة وفاصمة تعيش الآلام وصارت من ذوي الأمراض المزمنة في الكنام (الهم والزمم والخير مبزع لقدام) ووين ماشيين؟

      باهي هذا قهر ويزيدك اللي يحب رجوع بن علي ويقهرك بعياطو (اللي والفْ بالحفى ينسى صبّاطو ) وصار التونسي اسمو سي المدك على خاطر (المخنوقة ضحكت على المذبوحة ياخي المصموطة ماتت بالضحك) والتونسي الحر يدفع الضريبة والمثل يقول (كان الضبع يجي حجام حتى الغولة تجي طبيبة)
يا وين ماشيين؟

      كلمتين ونسكر جلغتي في سبت عشية رغم أنو نحسب الوقت هذا ليّ.
حكومة مؤقتة خرات فيه ومعارضة رسمية تحشي فيه ودستور بلاشي بلا بيه ويا مواطن اتحرك وإلا المهراس على راسك وتيه تيه يدك فيه.

      هذا تدوين وإلا تعفين وإلا حديث مجانين ولكن بكل حال موش ترهدين وإلا تهودين وإلا تسكبين وإلا تخرنين مشينا في خبر كان وما تقولوش ويين ماشيين.
حكاية من الآخر إما نؤمن أنها ثورة ونواصل وإلا نبقى صفر فاصل.
تدوينة مزمرة على اللي يفهم مقمرة... قهر سنين زدناه ميزيرة متاع عامين والسؤال ويين ماشيين؟