mercredi 9 février 2011

الفارينة اللي هي الطحين

      
الفارينة اللي هي الطحين
بداية نقلكم ساعدو رواحكم وبدون تنرفيز. لأنو ما سأقوله تعرفوه وتعرفو أكثر منو
أولا: باب النكد والتذكير
-       ناس ريقها شايح وعرقها يجري يشوفو شكون يعيط أكثر تعرفهم في الاجتماعات والحملات الانتخابية ومن سيماتهم كاش كول أحمر
-       مذيع أو منشط في التلفزة متحصل على شهادة من معهد الصحافة والآخر شهادة في القانون أو غيرها أو ما متحصل على شيء المهم يكون باش معلم في ضرب البندير باش يلقى بلاصتو
-       واحد يكتب على الدكان متاعو دكان

-       واحد يدهن كل ما يملك بالبنفسجي ما خلّى كان وجهو وجه مرتو وصغارو
-       واحد يكتب كلمات واحد يلحنها واحد يغنيها باش يعددو مكاسب التغيير
-       واحد يعمل موقع واب وإلا مدونة باش يقول أنو موش عبد إلا بفضل سيدو صانع التغيير (الغريبة 23سنة صانع منجمش يصبح عرف من الأعراف)
-       اتحاد ينظم ندوة عنوانها "20سنة من الإصلاح والإنجاز في مجال التربية والثقافة والعلوم" وعنوان فرعي "المشروع التربوي في البرنامج الرئاسي لتونس الغد" اتحاد الكتّاب هو المنظم تبارك الله
-       واحد ضيع سنين من عمرو موش في دراسة المنطق كيما يقولو في مسرحية مدرسة المشاغبين وإنّما باش يكتب هالكتاب
-       كتاب آخر بعدما الحجامة تحصلت على شهادة الباكالوريا سنة 2000 وشهادة معادلة للماجستير في القانون من جامعة تولوز الفرنسية. وكانت كلها عن طريق المراسلة، وميمونة تعررف ربي وربي يعرف ميمونة نلقى الكتاب هذا
-       واحد يعمل حزب معارض باش يعرّض للشعب بلغة الباندية وياخذ دعم من فلوس الشعب وكان عجبك
المهم أنا هو اللي تنرفزت تو لذا نتعدّى للباب الثاني
ثانيا: باب التمييز بين الفارينة العادية والفارينة الفاخرة
بعد كثافة الأسئلة في الفترة الأخيرة عن أنواع الطحين المختلفة والأفضل والأسوأ. وبعد الموضوع الأخير للمقارنة بين الفارينة العادية والفارينة الفاخرة. أصبح من الواجب المقارنة بين أفضل أنواع الفارينة رقم (1) والسبب هو توفره في جلّ الفضاءات الواقعية والافتراضية بالإضافة إلى سهولة الحصول أسماء أصحابها من أي مكان تقريباُ على عكس الأنواع الأخرى.
مقارنة اليوم ستكون بين نوعين من الفارينة رقم (1) من واقع المشاهدة اليومية في التعامل مع الأنواع المختلفة وهما فارينة مفضوحة و فارينة المطاحن الكبرى.
أولا ستلاحظون أنّ الفارينة الفاخرة وهي فارينة المطاحن الكبرى أفتح قليلا لذا يصعب التفطن إليها بسهولة. ولكن كلها صالحة للاستعمال
ثالثا: الاستعمال
 الكــوب المســتـخدم: كـوب سعة 7-11-1987
الملعقة المسـتخدمة: ملــعقة معلم يليّق ويدهن بالموف بالطبيعة
الكأس المستخدم:  كاس طرابلسي

المقادير
المجموعة الأولى
2
كوب صحة رقعة
2
كوب فارينة
1
كاس انحطاط
2
ملعقة ترهدين يمكن تعويضهما بتعرية الأفخاذ كل فخذ يساوي ملعقة
2
ملعقة سفالة للحشو
المجموعة الثانية
3
أكواب من مقالات في المدح
½
كوب زيت لزحلقة المعارضين
يقع خلط (مكونات المجموعة الأولى ) وتضرب الأخماس في الأسداس والسبعة زادة  وإذا العجنة ما طلعتش باهية يمكن إضافة ملعقة من تقارير تبدا بأُستفيد.
تترك كي تختمر مدة وترتفع على الجوانب.
تضاف (مكونات المجموعة الثانية). للحصول على عجينة طرية ومتجانسة كالتي تشاهد جالسة في الصفوف الأمامية. تترك جانباً حتى يقع تحضير الحشوات المطلوبة وستكون العجينة إنتفخت
هنا يقع تشكيل العجينة وتبدأ الحشوات .
وهكا تصبح فارينة حاضرة للاستخدام.
الخاتمة:
وين ماشيين بالفارينة حتى بعد ثورة الشعب
وين ماشيين بقلبان الفيستة ماركة غلطوني
لكن نقولها بكل حزم أي نعم بكلّ حزم وشرفي ما عادش ساكت على أيّ واحد مختص في الفارينة طحّان بالعربية الفصحى وحاجة أخرى أنا باخوس ماشي نتعهد بتمزيق صورة الرئيس القادم إذا شفتها في أيّ مكان لأنو إذا عندنا بلية التعليق نعلقو علم البلاد ونكونو في مستوى الناس اللي ماتت في الثورة وبربي منحبش ننسى المجاريح اللي يلزم نتلهى بيهم وباحتياجاتهم ورعايتهم الطبية.
ربي يحفظ الجميع من غبرة الفارينة

4 التعليقات:

لاعب النرد a dit…

... ههههههههه
الله يهلكك يا باخوس.. " الحشوات اللي ستحضر لاحقا" طلع طحين بالحشوات ..؟؟؟هههههه
و الله غلبوا علينا... المشكل في التلازم الغريب بين الطحين و البهامة...و الله شيء يندب

bacchus a dit…

@لاعب النرد
بداية مرحبا صديقي
عندك الحق شيء يندب لكن صدقني مستغرب كيفاش ينجمو اللي يعملو فيه هل هو ببهامة فقط أو ببهامة واقف معاها صندوق التعويض باش يعدلو بهامتهم ويظهرلي الثانية على خاطر مازالو قادرين على الاستهلاك الله يهلكهم

guyguoz a dit…

باخوس توّه من ألطاف هذه الثوره إنّو العبد ينجّم يقرالك ما غير بروكسي وزيد يعمل كيف على شطحاتك الفكريّه الطيّاره ومع إنّي معاك في إلّي قلتو نحب نذكرك إنّو الدّرويش متاع البعض و تمسكهم بهاك المثل إلّي يقول إسأل على صاحبك إستغناشي أمّا الصنعه هي هي عندو تفسير وحيد :تونس مبعّد الثوره مزّالت في المطهره ما تخرج منها إلّا ما ينحّيلها الشعب الوسخ الكل ..وقول قالتها غيغوز !

bacchus a dit…

@guyguoz
يا مرحبا يا مرحبا
غيغوز ايه زمان ما زرتناش
الشطحة الباهية كيف تكون جماعية هههههههه
عندك الحق وتعرف ظاهر يلزم كاغظ أحرش باش تصير شوية نظافة
المهم يلزم عينينا تبقى مفتوحة
وربي يستر

Enregistrer un commentaire