تونس... وكفى

       

مرحبا بكم

نهنيكم بالثورة؟ مبروك الثورة إذا هذا يريحكم.. الثورة في خطر؟ برا نقولو الثورة في خطر.. وقع الالتفاف على الثورة؟ برا نقولو وقع الالتفاف على الثورة.. صار علم تونس رمز للتحرر وصار البعض في المشرق خاصة يتحدثو على تونسة العرب؟ برا نقولو تونس رمز الثورات المعاصرة وبداية تاريخ العرب الجديد.. هذا الكل باهي وموش باهي كل واحد واستعدادو النفسي والانتماء الفكري متاعو واللغة اللي يحب يتكلم بها ويقراها مترجمة في لغة الضوء أو لغة الظلام كل واحد واستعداداتو لهذا أو لذاك.

اليوم حبيت نحكي مع ناس أخرين جاو من عالم آخر.. عالم كنت أعمى فيه عن فكرة الكمون كيما يقولو جماعة الفلسفة.. الناس هاذم هوما شباب تونس.. كلمتي هذي لشباب تونس.. ونقصد لرجال تونس.. ونقصد بالرجال موش الجنس نقصد الصحاح نقصد الرجولية بمفهوم الحومة.. وما تحمله من قيم الشجاعة والمبادئ والنخوة ورفض الظلم والقهر والإذلال.. شباب تونس اللي برشا كانو يقولو عليهم ضايعين فيها.. جيل الياغروط.. والعرا والقرا..  جيل الجال والسراول الطايحة والمراول المزينة.. جيل حبوه يكون متاع كورة وما عندي شيء ضد الكورة جيل يفقدو بناتو الوعي في مهرجانات وقت يشوفو المغني الفلاني.. كلمتي هذي كلمة اعتذار لشباب اللي أول ماشاف الحق خرج للشارع.. أول ما شاف شمعة قرر باش يخليها شمس.. أو ما وشوش الشارع رفع صوتو فيه.. رفع صوتو بحماة الحمى.. بكى وهو يقول فلا عاش في تونس من خانها.. هدى الورد للجيش.. صار يسمع نشرات الأخبار.. يناقش يحكي يقبل يرفض يوافق يختلف.. قلت كلمتي اعتذار لشباب خرج في النهار والكرتوش يخيط في الشوارع.. خرج في الريح والمطر.. خرج وبكى بسبب القنابل ولكن بكى من القهر وبكى من الفرحة.. رابط على الانترنيت وعمل مجموعات.. خرج في الليل يحمي دار الجيران ويحمي مؤسسات.. خرج ونسى روحو على خاطر تذكر تونس.. وهذا الحب.. تنسى روحك باش تعيش من أجل اللي تحب.. نحبكم يا شباب تونس.. نحب اللي جاء وبات في الصرد وفي المطر في القصبة.. نحب اللي جاب خبزة على خاطر ماعندوش حق خبزتين باش يناصر المعتصمين.. نحب اللي عرى روحو باش يغطي اللي جاء واقف مع القضية.. تعرى والبرد ياكلو لكن الكرامة تدفيه نحب اللي نسى أنو تونس فيها ق وفيها ڨ نحبكم يا من منح البلاد ضمانين.. الحاضر اللي عملتوه.. والمستقبل اللي الواحد صار ينظرلو باطمئنان.. لأنو صار شبابنا راجل بالمفهوم اللي حكينا عليه.. البلاد أمانة.. وأنتم أهل لها.. تونس ما عادش دولة صغيرة نكرة.. اللي يقول تونس اليوم يقول الكرامة والعزة وقدوة الثورات القادمة والقاموس هذا.. أنا نقول تونس اليوم هي تونس. وقت شفت تلامذة المدارس ينشدو حماة الحمى في المدارس والاعداديات والمعاهد والناس الكل في الشوارع والبطاحي وفي كل شبر في بلادي.. بصوت يقول من خلال النشيد احنا هنا.. نحبك يا تونس.. نحبك يا بلادي..