lundi 18 janvier 2010

وين ماشيين


      عندي مدّة وخوكم باخوس مخو واقف... راني رايح فيها وصلت نحشم من عقد الجهل متاعي... يا أصدقائي يا اخواني يا جيراني يا أنس يا جن يا عالم يا ووه  النجدة النجدة إليّ أنقذوني معادش فاهم. ندخل للبلوغوسفار نلقى ناس استولات على الوطنية فصلتها على قياسها وخيطتها ولبستها وقالت متاعي.. الوطنية متاعي وظالم روحو اللي مقاسو موش كيفنا وهذا في السياسة بالطبيعة... جيت للاقتصاد كل واحد يقلك المنتوج الوطني ويلزم تشجعو شركاتنا ومصانعنا على خاطرها صناعة وطنية ونفس لعباد هاذم يعملو رحلة الشتاء والصيف للخارج باش يشريو ما لازمهم من برا... تو حتى في الرياضة الناس الكل تتعارك وتسب ومخص كان الضرب والبونية تخيط لو كانو في وجوه بعض تسأل علاش كل واحد يقلك لاخر موش وطني... تو بربي نحب نفهم اللي عندو وقت يفهمني ومستعد ندفع ساعات زايدة متاع تدارك إذا البرنامج صعيب للدرجة هذي شنية حكاية هالوطنية اللي الناس الكل تتعارك عليها؟ وإذا موش ممكن التفسير قولولي يخي الوطنية يلزمها تكون عند ناس معينين وإلا ممكن تكون لكل من يحب هالبلاد؟ وإذا كانت لناس مخصوصين شنية الوثائق المطلوبة وإلا كراس الشروط وإلا الدمار الأحرف باش واحد يتسمى وطني في هالبلاد؟؟؟؟؟      

4 التعليقات:

kacem a dit…

درس 1

شوف الوطنية ألي يحكو عليها الجماعة القزوردي هذيكه إسمها سلاح : يعني وقت ألي الواحد ما عندوش باش إدافع على مواقفو بالدليل و الحجّة ...
و يفشل في عملية أقناع ألاخرين بالتمشي متاعو أو السياسية متاعو ..يلتجئ ألي سلاح التخوين ..يعني نزع الوطنية على كل من ينتقدو !!! و يلبس هو بالذات زاورة الوطنية !!!

درس 2

بشكل أو بأخر ..القزوديين أحبو يوصلو ألي هدف واضح و هو تمرير مفهوم الوطنية في شكلو التافه عند كل التوانسة ..يعني باش إتكون وطني لازمك إتكون في الشعبة ..ولازمك إتكون موافق على الآختيارات و تصرفات و ممارسات الدولة !!!

درس 3

الشيئ هذا مخدوم في أعلى هرم السلطة مش فقط كلام مدّونين ...بل هو برنامج سياسي واضح ...: تشليك مفهوم الوطنية ..تشليك الوطن ..تشليك الثقافة ..تشليك السياسية ..تسليك كل شيئ ...باش إتموت المرجعيات و تندثر باش يقتلو في الشعب هذا حب الحياة ..باش ما تتطلع حتى نوارة ..هكة لآنهم أخافو من مواجهة الحقيقة و ما عندهم باش أقاومو !!!

درس 4

الوطنية القزوردية ..هي إتعبر على مفهوم صغير ياسر ..على فضاء ضيق للغاية ...لآنهم ما إنجموش أعومو في بحر كبير و فيه برشة أمواج ..و لذلك يخلقو في أحواض صغيرة إتعومهم ...و يبقو يحلمو بالي هوما أخوضو ..محيط !

bacchus a dit…

@Kacem
شكرا على الدرس ووين ماشيين

H B J a dit…

http://patriotetunisien.blogspot.com/2010/01/video-fawzi-benzarti-patriote-watani-ou.html

lol

regarde fawzi benzerti ech 9al

bacchus a dit…

@ HBJ
اقرا التعليق في مدونتك موش مشكل

Enregistrer un commentaire