jeudi 29 mars 2012

أمثال شعبية في زمن الهلوسة 2

بعد الأمثال الشعبية في زمن الهلوسة1 إليكم الأمثال الشعبية في زمن الهلوسة2

- في العقدة يخرى النجار: موقف النهضة من السلفيين

-خبز وزيتون عيشة مغبون: المثل مزيف وأصله لطفي وزيتون وشعب تونس المغبون

-عمتك أخت بوك خال ولدها شكون؟: من أخطر أسئلة الوجود عند التكفيريين

-اللي ما تعرفش تندب لواه يموت رجلها: تونس وشهداؤها وجرحاها

-كلام الليل مدهون بالزبدة تطلع عليها الشمس وتذوب: الوعود الانتخابية لجماعة الترويكا 

-آش جاب فاطمة لحْبيبة .. وآش جاب الحبس للحمام .. لو كان الغولة تولي طبيبة .. حتى الضبع يجي حجام: من زاروا تونس وقالوا دعاة الإسلام والسلام
  
-الحنضلة ما تولي تفاحة و الخرشي ما تبان فيه ملاحة: من دنّس علم تونس

-اربط البهيم حذا البهيم..إذا ما علمو الشهيق يعلمو النهيق: تحالف بعض الأحزاب

-عاملين كيف الدجاج كل نهار يقولو غدوة انطيرو: أعضاء الحكومة في تصريحاتهم

-مشيانك حافي ولا تكركيرك في الشلايك: للشعب التونسي بعد تعيين بعض وزراء ما بعد الانتخابات

-كان النواح بالطلبة لا يرحم من مات: إلى وزير حقوق الإنسان لكن وقتها ميمونة تعرف ربي وربي يعرف ميمونة (موش في السد متاع المسعدي)

-قالوا للجمل زمّر قال لا شفايف ملمومة ولا صوابع مضمومة: حال الشعب التونسي اليوم

-الحرث المغشوش خطوطو خسارة: الانتخابات حين تخيّب الآمال

-دخلّناهم يشربوا فى الرايب قالوا وحقّنا فى الزرايب: وزير التشغيل 

-الماء اللي ماشي للسدرة الزيتونة أولى بيه: أحسنت وبرا شوف فاتورة الصوناد يا معلم

-آش مقعدك مع النخالة حتى يبربشك الدجاج: صديق كنت أودّ ألا أراه في المشهد السياسي الرسمي اليوم

-كان قاعد قام يبوس في الحيط: المرزوقي الحقوقي والمرزوقي الرئيس 

-كسكسلو يرجع لأصلو: حزب النهضة بين التفجيرات والانتخابات

-ما تاخوش هجّآلة و كان يبدى خدّها مشموم، قد ما تكركر وتجيب تقلّك يرحم المرحوم: الدساترة والتجمعيون الجدد
 
-ملّسْ من طينكْ يقعدلك إذا ما جا بُرمة يجي كسكاس: إلى عشاق تونس

الدنيا بحر... فيها الباهي و المشوم... و انتي اعرف وين تعوم.

6 التعليقات:

الحلاج الكافي a dit…

شكرا.... أضفت إبتسامة صباحية ...عجبتني متاع الجمل



-قالوا للجمل زمّر قال لا شفايف ملمومة ولا صوابع مضمومة) ...أصبت صديقي في أمثالك.

Athena Pallas a dit…

haha
excellent

bacchus a dit…

@Al-Hallège
مرحبا صديقي
شكرا على التواصل

bacchus a dit…

@Athena Pallas
شكرا
مرحبا بك

CHAMS AL ASSIL a dit…

أغلب الأمثال لا أعرفها! يعطيك الصحة

bacchus a dit…

@CHAMS AL ASSIL
شكرا
على المرور والتفاعل. سعيد بصداقتك

Enregistrer un commentaire