jeudi 20 février 2014

تغريدات محشوة بالمصائب المفرومة

   

     تغريدات محشوّة بالمصائب المفرومة

      هنا الخضراء حيث يبكي الخروف على الظروف والسّلام شكون يعرف شنوة ثمة القدام
                                 
                                        *********
     في الخضراء رئيس أنساه الكرسي أن يقرأ ما تيسّر من الواجبات وأن ينظر إلى شعبه ليستجلي الأولويات وهو من يطيل تأمّل (السقوفات) ينتظر الآيات وأخيرا.. أخيرا... أخيرا.. أوحيت إليه البيّنات بأنّ أولى الأولويات هي حسم الخلاف الخطير في موضوع مياه (التوالات)  
                                     
                                       *********
    في الخضراء يعرف الناس الأحزاب ولا تعترف بهم الأحزاب.. أحزاب كمومس (مكحّلة لهذاب) ترشح عسلا (ماسطا) تظنّ الكلّ سيتساقطون عليها كالذباب.. وليس منهم سوى مشعوذ أو داعر أو أفّاق من أساتذة مسيلمة الكذّاب.  

                                      ********* 
    في الخضراء ثمة شكون جات محنتو في الفضايح ضربانو البندير والريق شايح للغنوشي والشابي والباجي واللي عارهم فايح  بهيم ناقص صفايح فارينة زرقة والقدر الطايح يميل مع الأرياح عامل فيها رابح وهو فيها رايح هكا بالو يغنيلو فيا أحرار نوصيكم اللي يحل (زنبيلو) سربيلو وإذا ناقص موش مشكل عندو عبيلو.
          
                                     *********
    في الخضراء برشا يموتو على ركبة عريانة وقارورة مليانة وركشة فنانة وجونة مزيانة وغدرة بفيانة وفي طمبك سكرة عالمية يرفعوا كاسهم ويقولو وحق المعصية هاذية وتكون سلكتها إذا ما تحولش النقاش إلى الاستشهاد بمعاني آيات قرآنية يتحفوها ساعات بأحاديث نبوية وتبقى باهت تغزر في ابليس ينهى على المنكر وهنا تقرر البهجة لبس الحجاب ويقسم المنطق أنو ماشي يفصّل جلباب ويضربلها نقاب. وفي الخضراء البعض يسمي باسم الله وقت يترشّف أول كاس شراب.

                                    *********
    في الخضراء برشا قلوب ضعيفة تبكي على البوليس كي يتضرب وكي يضرب أمو تتسب ما اسهل رضاهم وأسرع الغضب وهكا اللي يفهمهم يأخذ اللي يحب.

                                   *********
    في الخضراء يتجمع الناس وقت مداهمة بالكرتوش وقمّة الخطر.. فيراج يشجع تقول الواحد فيهم سوبرمان موش بشر.. ويخافو من الإرهاب وقت يصير الحكايات على القنوات. 

                                  *********  
في الخضراء عجايب وغرايب ومصايب وأكيد بعد أجيال قليلة تطلع شبيبة بليدة تخلق ملخضراء حكاية ألف ليلة وليلة جديدة.

0 التعليقات:

Enregistrer un commentaire