mercredi 25 septembre 2013

ويين ماشيين 30؟




    وين ماشيين 30؟

    الصيف مصيبة.. المرض كارثة.. الضيافة تعني العجة بقية الشهر فحتى الدجاج صار زهومة   (كيما اللحم زمان الله يذكرو بخير) رمضان والروج في البنك عرسو مع بعض.. العيد الصغير واللبسة متاعو ضربة قاضية بعد ما صار الفريب ما يقومش بوظيفة البودي غارد حتى هو عمل باتيندة وصار مستثمر على روحو.. عيد الأضحى اسم على مسمى جيب المواطن.. دخول الأولاد للمدرسة طريحة نباشة القبور.. الشرب لعشّاق النبيذ شوية في الدنيا (الحرق صار بالحاضر).. قفة القضية صارت قضيّة وحدها لازمها أبحاث عن مصادر التمويل وتحقيق في الضروري والثانوي واستنطاق لقوائم الأسعار عبر الأسواق وبعد مشي وجي ومرج يقع الحكم بعدم سماع الدعوى للحم وأغلب أنواع الأسماك والغلال والخضر غير الموسمية ويقع التصريح بالحكم في السماح بحارة بيض لعائلة من ستة أشخاص (الخَسارة لَيْنْ)..

    ضوء الستاغ صار يضرب ويشل المواطن.. والسوناد تغرّق صاحبها في الديون القذرة شبيك حتى هي مربوطة مع الأوناس يعني تدفع وقت تشرب وتدفع وقت تخرّج اللي شربتو.. القهوة في بعض الأماكن تقول طلبت عسل نحلة صافي.. الدخان تقول الواحد يحرق قلبو تلقى السي قارو (إيه نعم السي قارو موش القارو) أغلى من باقات.. والباقات نفخة كذّابة تنجم تهرب باثنين إذا عندك شباب في طلوعهم (وشنوة يملا ضلوعهم) والهاتف تدفع الضرائب بحكم العقد اللي عملتو مع المشغل وتدفع وقت تمويل الهاتف وتدفع للسيد اللي يمول الهاتف يعني تدفع ثلاثة مرّات قبل ما تحل فمك وتتكلم (شبيه ساهل الواحد يحل فمو في هالبلاد.. الدنيا موش سايبة راهي).. تمشي لمحطة القطارات هاكي متاع الخطوط البعيدة يقلك قطار الساعة الواحدة وخمس دقائق يخرج الساعة الثانية وإذا صادف خرج في الوقت لازم يوصل بعد الوقت الموعود للوصول مع العلم أنّك دفعت ما قيمته الغذاء متاع عايلة إذا كان المكان بعيد.. صحن التونسي والكفتاجي وصحفة اللبلابي كلهم خاضعين لضرائب داخلية فكلما قلت بزايد زيت أو عظم أو فريت أو هريسة أو تن يترجمو السيد البائع بزايد فلوس.. وإذا عندك شكون يدرس دروس التدارك راهي زادت على خاطر الدنيا غلات.. المهم كل شيء غلا كان المواطن العادي رخص.. مرّة صديقة قالت:" موش لازم يزيدو في الراتب ونتمنى في عوض يزيدو في الشهرية يرخصو في الأسعار." هعهعهعهع (صديقتي مازالت تحب تفكر في عصر الامنطق.

   الحكومة تقول التونسي عايش قاعد ياكل ويشرب ويضغط على الزر يجي الضوء يحل السبالة ينزل الماء بل التونسي قاعد يمشي للفنادق.. التونسي تعلم يفندق والبلاد اللي رئيسها ما يكلف خزينة الدولة حتى شيء والوزرة متاعها وكتّاب دولتها والحاشية (اللي تحشي فيه) ما تكلف حتى شيء تي شنوة يتكلف بونوات البنزين والسيارات والامتيازات الأخرى حتى شيء.. التأسيسي هذكا قصة وحدو.. التونسي تعلم يفندق في الفلوس لذا لازم البنوك توقف الروج ولازم الاتحاد متاع الشغل يوقف المطالبة بالزيادات ولازم ولازم ولازم وشنوة آخر لازم يا أولاد القحة (كما في العربية الفصحى وقد وقع حذف الباء للتخفيف) شنوة لازم آخر.. ووين ماشيين؟      

6 التعليقات:

chipie-chipounette a dit…

دائما مبدع صديقي

Anonyme a dit…

عريت الجرح صديقي ... التونسي موش باش يقول مادام عندو الصو و الماء و العجّة ....

*الخسارة لين : كلمة صفاقسيّة ؟؟؟ هل تعني الخسارة ليش؟

دمت صديقي ...عندما تنساني أتذكرك
لا أدري لماذا حصرت في اللوحات ؟
كنت في صبوة خمر لا لعرفها حتّى الله فحضرت

تحياتي...
الحلاج....

bacchus a dit…

@ chipie-chipounette
Merci pour les encouragements chère amie. .

bacchus a dit…

@الحلاج
شكرا على المرور.. أسعدني ما كتبت من تجليات خمرتك الوجودية
في انتظار عودة مدونتك.
أرفع كأسا على نخبك

Anonyme a dit…

هههه ,,,, الحرق ولى بالحاضر ,,,ههه ,, و الله صحيح ,,, مسطوها القطرة
bastos

bacchus a dit…

@Bastos
قلت الحق صارت قطرة.. يقطرولنا كأننا على فراش الموت
لكن قطرة ماء حياة خير من قارورة بول بعير ههههههه
الحياة اجمل صديقي

Enregistrer un commentaire