dimanche 18 août 2013

ويين ماشيين29

 
  

ويين ماشيين؟

      طاح البول على الخرا قاله يا محلا ريحة الأحباب (شيوخ الحكومة والمعارضة)
وفردة ..و لقات أختها .... هكا نشوف المشهد في البلاد... حكومة ومعارضة.. واللي ما عجبوش عندو البحر يشرب منو كيما قالت وزيرة وأد المرأة أو يشرب من أيّ بول يختارو سخون وإلا بارد ووين ماشيين يا سي المواطن.. ناس في باردو (مع الضغط لكن مع مرور الأيام دون فعل حقيقي يصير ريق بارد موش باردو) وناس في القصبة (مع استبدال القاف عين طبعا) وناس تحكي على البلاد والفلسة (كأنو غراب أعور طاح بفولة مسوسة) وناس تحكي على اتحاد الشغل والتقصير (والليلة ليلة واضحك يا قنديل العروسة طويلة وباب الدار قصير) وناس تحكي على أرض الكنانة (ووضع الهانة ورقود الجبانة) وناس على الفايسبوك تنبر على السبسي السارف والغنوشي الخارف وكل من لحمو شارف (في تونس صرنا الخرا نعملولو مغارف) وناس معتصمة وناس بالوضع عاصمة وجبهة على القيادة متخاصمة والثورة عملولها جبيرة وفاصمة تعيش الآلام وصارت من ذوي الأمراض المزمنة في الكنام (الهم والزمم والخير مبزع لقدام) ووين ماشيين؟

      باهي هذا قهر ويزيدك اللي يحب رجوع بن علي ويقهرك بعياطو (اللي والفْ بالحفى ينسى صبّاطو ) وصار التونسي اسمو سي المدك على خاطر (المخنوقة ضحكت على المذبوحة ياخي المصموطة ماتت بالضحك) والتونسي الحر يدفع الضريبة والمثل يقول (كان الضبع يجي حجام حتى الغولة تجي طبيبة)
يا وين ماشيين؟

      كلمتين ونسكر جلغتي في سبت عشية رغم أنو نحسب الوقت هذا ليّ.
حكومة مؤقتة خرات فيه ومعارضة رسمية تحشي فيه ودستور بلاشي بلا بيه ويا مواطن اتحرك وإلا المهراس على راسك وتيه تيه يدك فيه.

      هذا تدوين وإلا تعفين وإلا حديث مجانين ولكن بكل حال موش ترهدين وإلا تهودين وإلا تسكبين وإلا تخرنين مشينا في خبر كان وما تقولوش ويين ماشيين.
حكاية من الآخر إما نؤمن أنها ثورة ونواصل وإلا نبقى صفر فاصل.
تدوينة مزمرة على اللي يفهم مقمرة... قهر سنين زدناه ميزيرة متاع عامين والسؤال ويين ماشيين؟


       

6 التعليقات:

Anonyme a dit…

تدوينة كلها غضب ، لدرجة أنني موقعت نفسي في موقع (انت سبيتو للي عييت ) يعني شهر رمضان كامل منقوب من الرحيل ... أتفهم غضبك صديقي لكن أين الحل نحن شعب بلا قيادة سياسية منذ سنين ، يعني نحن نمارس السياسة الرعوانية
et la carte وموش عارف وين ماشين

الحلاّج...

bacchus a dit…

@الحلاّج
شوف صديقي لابدّ من لقاء لنتحدث.. لن أستغني عن آرائك الحكيمة. في انتظار كاس وكلمة وعودة مدونتك أيها الرائع

Anonyme a dit…

نعم صديقي ..نلتقي قريبا ...سأهاتفك في بحر هذا الاسبوع ...

الحلاّج..

WALLADA a dit…

لا ضير أن تتدنَّى لغة الخطاب إلى الحضيض فالغضب مشروع، أما و إن جاءت بقلم صهباء التدوين فمعنى ذلك أنّنا حوصرنا في الرّكن المظلم فإمّا أن نموت كمدا و نندثر و إمّا أن نـُـحدِثَ فـتـقا في الجدار فـنخرج للنور و الألوان و الحياة. فـمـدَّ يدك يا صديقي نحمي و نبني و نطفئ الحريق فتحت هذه الأرض دفنّا الأعزّاء و فوقها مرتع الأبناء و عار علينا أن نخلّفها لهم خرابا.

bacchus a dit…

@WALLADA
معجم الألفاظ من سياق المقام فنحن نعيش العهر السياسي واضحا مراودا على قارعة الطريق
البناء سيكون ولكن بتّ لا أومن بالترميم. هذا زمن المحو (الأخطاء والأعداء) وسنكون دمت مثابرة على حبّ هذا الوطن العزيز
دمت صديقتي

Anonyme a dit…

خرينا فيه على رواحنا...
واللي يعجبك إلي خرينا خرية اللي يؤذن وساقيه في الخرا...
وكيما قالوا جماعة Feminism Attack :
بالراجل بالمرا كلنا في الخرا

(فلاديمير (بوتين يا معذبهم

Enregistrer un commentaire