jeudi 2 mai 2013

وين ماشيين28

   

   وين ماشيين28
  
 تونس: روزنامة 2013
      
       جانفي انتحار.. انتحار وإذا ما تموتش وحدك يجيك فيفري وكان شهر الاغتيال.. وإذا الموت راحة يجي اللي يتعّبك يقبض عليك مارس شهر الاغتصاب.. باهي الانتحار يكون شخص واحد والاغتيال زادة والاغتصاب كيف كيف.. في أفريل فك علينا من العذاب بالتفصيل ونخدم بالجملة.. أيا سيدي ندوروها جرم جماعي وكان الشعانبي وكان الانفجارات.. موش هكة روزنامة الثلث الأول من هذا العام اللي فيه 13 رقم التشاؤم والسواد والهم. الشهور السابقة مرّت وجاء شهر ماي باش يدستر الأشهر السابقة من خلال مسوّدة الدستور. برا الله يدستر وجهك.. أكحل كي الدستور.. مدستر ملوّد.. عبارات شعبية يعوض فيها السواد ومشتقاته بالدستور.

      الانفجارات.. القتل.. أعوان الأمن يذبحون.. الحرس في حقل ألغام.. الجيش في خطر.. وقت كنت صغير نشوف فرد(هكذا كنا نسمي المسدس) في جنب عون أمن كنت نفكر أني موش باش نسمع صوتو نهار على خاطر أنا في تونس واليوم آهو تفجيرات وصوارخ مداها قريب في الشعانبي وقلت علاش؟ ساهل برشة معادلة فيها تونسي في أفغانستان والباكستان وسوريا ومالي ويجي أقبل البدر علينا ويقلك يبشروا بثقافة جديدة ويذكروني بشبابي.. تفجير فنادق وماء فرق وووو يظهرلي المعادلة واضحة توة. ما كانش غالط.. كان صريح جدا ولكن التونسي اللي يتشرى بعلوش وقفة خضرة وحتى بكسكروت وباكو شوكوتوم كان مهجتو وفؤادو (في اللي خاف من ربي) وخذات النهضة السلطة. البعض سكّر فمو على خاطر اللي تُضربو يدو ما توجعوش والبعض سكتوه بفلوس التعويضات والبعض ندم والبعض حب يلعبها ديمقراطي وهكا حكمت الانتخابات يلقى روحو الراس على الأرض والساقين الفوق.. والبعض تونسي..

التونسي:
      البطالة والغلا والكوى ويشرب وإلا يطير قرنو والفقر والهم والتوتر والحيرة من نوع علاش الدستور هكا؟ علاش المرزوقي رئيسي؟ علاش النهضة تعمل اللي تحب؟ علاش أنا خايف؟ علاش النائب في المجلس يتباع ويتشرى كأنو في الميركاتو..؟ علاش الشراب يزيد كل شهر؟ علاش الدخان صار يحرق قبل ما يتحرق؟ علاش اللي يصلي وما يجمعش يديه على صدرو كأنو ما صلاّش؟ علاش كنّا نقولو للي يسكر فلان يشرب هكذا في لطف واللي يصلي فلان هاديه ربي وصرنا نقولو للي يعبر على رأي مخالف للترويكا كافر؟ علاش شيوخ الوهابية صارو حكماء العصر؟ علاش قرر وزير الرياضة المباريات دون حضور الجمهور ويفتحها للجمهور قاعات وملاعب وقت يجي أُلعُبان من متاع ختان البنات وبول البعير والمساواة بين الجنسين موش ممكن على خاطر يقلك خلّي الراجل تجيه العادة الشهرية باش تكون مساواة؟ علاش صرنا هكا؟ وين ماشيين؟

      علاش سهام بادي؟ علاش الحبيب خذر؟ علاش مصطفى بن جعفر؟ علاش يتذبح راجل أمن تونسي؟ علاش يتعمى أو تتقص أرجل من يحمي الوطن؟ صحيح نشيدنا قال نموت نموت ويحى الوطن ولكن فيه إذا الشعب يوما أراد الحياة كتبها الشابي في ديوان أسمو "أغاني الحياة" والقصيدة "إرادة الحياة" فعلاش اللي يحكمنا يُنظّر لثقافة الموت والكفن والسواد آسف الكفن والدستور. علاش نموت نموت علاش موش نعيش نعيش ويحى الوطن. ما قتلنا حد لا الوالي ولا المعتمد ولكن تونسي يقتل فينا. علاش؟؟؟؟؟؟

   ومع ذلك:
      تونس درة والنهضة غدرة والقصبة جُرّة والدنيا مُرّة واللحظة غبرة تسكسك العبرة على تونس حرّة والحصلة مَرّة ورويّق الثورة اسكت كسرة تفكت بالنطرة والدنيا غبرة وتونس ليل تستنى في القمرة واحنا كي الجمالية تعبانين وين ماشيين؟

   

   

3 التعليقات:

chipie-chipounette a dit…

علاش؟ على خاطر 50 سنة شعب مغيّب على السّياسة إلاّ من رحم ربّي...
علاش؟ على خاطر 23 سنة والقراية عمّال بالتّوالي لين الشّهادة ولاّت تسوى 2 صوردي...
علاش؟ على خاطر 50 سنة نظام اقتصادي كثّر الفقر...
علاش؟ على خاطر 23 سنة سرقة و رشوة زاد فقر على فقر... والفقر كافر
علاش؟ على خاطر 50 سنة تربّينا على سكّر فمّك، ورد بالك وخاف من خيالك
علاش؟ على خاطر 23 سنة علمونا الانتهازيّة واخطى راسي واضرب وخلّي ندبّر راسي
بهذا الكل ما انجموا نكونوا كان شعب جاهل، أحمق، انتهازي، سارق، جيعان وزيد فوق هذا خوّاف وما يهمّوا كان روحو فبحيث ما ينجّم يحكم فينا كان الجاهل، الأحمق، الانتهازين، السّارق الجّيعان، الخوّاف واللي ما يهمّوا كان في روحو...

chipie-chipounette a dit…

ونسيت باش نقول تدوينة رائعة صديقي :)

bacchus a dit…

@chipie-chipounette
تعليقك في الصميم عرّى المخبري وكشف بعض العورات
شكرا صديقتي الرائعة

Enregistrer un commentaire