وين ماشيين27

    وين ماشيين 27

      هذي تدوينة داخلة بعضها كيما موضوعها ولكن ثمة تنبيه في البداية اللي يحسب نفسو  

 صفوي متعفف موش لازم يكمل يقرأها.

     جهاد النكاح.. يطلق زوجته في سويا ليهبها للمقاتلين.. سامي الفهري يوضع مع الشواذ جنسيا.. طفلة في الثالثة من عمرها يقع اغتصابها.. فتاة مختلة المدارك العقلية بنت إحدى عشرة سنة يقع اغتصابها.. أمينة تعري نفسها كوجه من وجوه النضال وكانت ضربة البداية فقط.. ثلاثة أمنيين يغتصبون فتاة.. محجبة يقع اغتصابها.. قبلة في الشارع بين عاشقين عقوبتها شهرين حبس..  وخلينا من المرأة مجال تفكير العقل العربي على امتداد التاريخ الإسلامي. (الزواج، الطلاق، الحيض، والنفاس)، مجهود لا نظير له في السياسة والاقتصاد والعلوم.. وخلينا زادة من كتب كيما الروض العاطر في نزهة الخاطر للشيخ النفزاوي أو نواظر الأيك في محاسن النيك لجلال الدين السيوطي وغيرهما كثير.

      نحب نحكي على تونس.

     باهي السافرة يغتصبوها على خاطرها تمارس في الاغراء إيه واللي يغتصب بنية صغيرة؟؟ والمحجبة يغتصبوها آهي محجبة يا سيدي وين الاغراء ووو... والغلط دائما السبب متاعو المرأة هذا على الأقل اللي يدور عند برشا عباد لكن نرجعو للبداية تو فتاة تمشي تقحب مع عشرين وحش كل واحد ساعة قال شنوة جهاد النكاح وتدخل للجنة على خاطر فرهدتهم وطلعتلهم المورال وحسو برجوليتهم  إيه وقتها يقلك واحد آخر ما هو اللي في البورديل بالمنطق نفسو  هذا تدخل للجنة على خاطرها تفرهد في الرجال باش ما يغتصبوش نساء اخريات وحسستهم بالرجولية متاعهم..

النساء سبب البلاء برا ميسالش (إلى حين طبعا) واللي يشد في الأولاد الصغار يفاحشهم شنوة نسمي هذا؟ وقالك نسبة كبيرة في المجتمع التونسي شواذ.. وقالك الحل في تعدد الزوجات وقالك ثمة نسبة كبيرة متاع خيانات زوجية وتسأل الراجل يقلك خذيتها (تجاري يعني مصلحة مادية) موش (عقاري يعني للبيت) وتسأل المرأة تقلك سيدي ما يتذكرني في الفرش كان مرة بعد قدّاش.. إيه هنا لو نزيدوهم تعدد الزوجات زعمة يغمض سيدي عينو على نساء الشارع وإلا نزيدو في الخيانات.. وثمة حاجة عند التونسي يبدا يتشوحر وعينيه باش تخرج وهو يفلي في بدن المرأة بالسنتمتر المربع والكارثة يقلها تفضل اختي.. يعيش اختي... أختو في شنوة؟؟؟

     حسب بعض الاحصائيات على محرك البحث قوقل كلمة ساكس أكثر ما يكتبه التونسي وحسب إحصائيات أخرى تسعة توانسة على عشرة شاهد ولو مرة شريط إباحي والتونسي اكثر واحد يستعمل عبارات جنسية في التعبير متاعو سواء للتعبير على ما يعجبه وخلي عاد إذا تنرفز وقتها تسمع القصائد العصماء. طبعا ما تنساش التونسي وقت الغشة في الكلام فكل اللي ينتهي بال(ه) أو (ها) في معرض حديث يصبح يضحك مهما كان موضوع الحديث وظاهرلي حتى شركات الاشهار فاقت باللعبة من نوع (ما نعملو شيء)...

     شيوخ داها في الجنس شباب لغتهم جنس ورغم انهم ما يقصدوش المعنى الحقيقي للكلمة ولكنها من نفس المعجم.. المرأة تشوف واحد شبيب مزيان تلصقو وتقلك "يقتل" وإذا كان مشهور ومغني خاصة تنزع حاجات أخرى (اتذكرو بعض حفلات قرطاج) والراجل إذا امرأة ضحكت ليه يمشي يجري يتسلف في مفتاح دار صاحبو أو يمشي يفرش الفرش متاعو.. شيء كبير.

     نرجع لحكاية الاغتصابات اللي الواحد صار خايف على كل شيء من كل شيء تي وين ماشيين؟   

      حاجة أخرى حكمو العلمانيين وحكمو (الخوانجية) والشيء زايد على قدّام   

يخي بلاد هذي وإلا بورديل؟ وإلا جنة الشواذ؟ 

     وقتاش نفهو شنوة هو الجسد قلت نفهو ما قلتش الجسد وحدو. الجسد ثقافة ويلزم (بكل حزم) يفتح الملف هذا ويوقع تحيين القوانين. ويين ماشيين؟؟؟؟