mercredi 26 septembre 2012

التونسي يموت على (show) و(show)ها.



التونسي يموت على (show) و(show)ها

تنويه: التدوينة لا تعمم حين تقول التونسي.


     التونسي إذا اختلف مع تونسي ويكونو راس راس موسيقى صامتة وكل ما زاد عدد الحاضرين يبدأ (show) صياح وسبّان وسيبوني عليه وهو يتمنى ما يسيبو حد باش يعمل الـ(show) متاعو وقت تصبح (show)ها يجي الحاكم ويعمل الـ(show) متاعو ويعمل للجماهير الغفيرة (show)ها زعمة زعمة يحافظ على الـ(show) متاع البلاد.

     الموظف التونسي يعمل (show)ها ويفركهم على عرفو وقت يدخل باش يقابلو يعمل (show) متاع استقامة وأدب وتفاني وطحين زايد أحرف وقت يخرج يقول للزملاء متاعو موش خايف منو العرف تو دخلت عمتلو (show)ها.

     التونسي ما يعرفو دين إلاّ بلحية تعمل (show) وسمة على الجبهة (من أثر السجود) كل ليلة يهرب فص الثوم من مكانو فتلقى جبهتو سمات سمات  يستغل الموقف تونسي آخر باش يعمل منها (show) ها.

      التونسي ما يعرفو شراب كان بعد ما يصبح (show)ها.

     المواطن التونسي وقت تجيه فرصة قدام الكاميرا يعمل (show) متاع الحكومة تخدم ولازم ناقفو معاها وبقية مصطلحات الملف اللي تعرفوه ويعمل للمعارضة (show)ها ومواطن آخر في نفس الموقف يعمل (show) متاع فقر وميزيرية وهموم زرقة وبطالة ومرض ولكن ما يعملش للحكومة (show)ها على خاطر مازال عندنا توانسة يطمعو في العسل من تييييت الفرززو.

    العائلة التونسية تمول الحرقة متاع صغارها وقت تنقطع أخبارهم يعملو (show) متاع ناس مظلومين من النظام اللي يعملولو (show)ها باش يرجعلهم صغارهم أما العائلات هذي ما تقولش لصغارها أنت منفي في بر الطليان (وهو نوع من الموت) أو ميت في البحر لذا أعمل (show)ها للحكومة وخوذ حقك في بلادك.

     الحكومة في تونس تعمل الـ(show) متاعها وقت اتطيح بذرة حق لصالحها وتعمل (show)ها للشعب وقت واحد ينقدها يعني كي باندي الحومة رابح رابح وهذاكا علاش الفرق بين الحومة والحكومة حرف الكاف المستعمل للتشبيه، الحكومة تسيّر البلاد بعقلية أولاد الحومة (الحكومة كباندي الحومة).  زعمة (show) وإلا (show)ها؟.

     هذه أمثلة قليلة من آلاف الأمثلة لكن التونسي والحق يقال مغروم كذلك بأسكت، درّق، خبي، خليها في المغموتة، ما تشلقش، ما تفضحناش، غرزة ميتة، وقت مصالحو الشخصية في اللعبة.
تعرف البلاد هذي يا إما تعمل (show) على قاعدة يا إما حكمت على روحها باش تكون (show)ها.

     والتونسي يموت على (show) أو الـ(show)ها حسب مصالحو الشخصية. الثورة في العقل قبل كل شيء موش في ريق عملنا الربيع العربي. وسيب عليك من الـ(show)ها تعمل بيها (show) قال شنوة فاهم وفايق ووليدها.

     التونسي فاهم التونسي سواء كان في الحكومة أو من عامة الشعب لذا سيب علينا من الـ(show) والـ(show)ها وإلا لا ثورة ولا تييييت والبلاد والعباد الكل ماشية في تيييييت.  
   
 
 
 
   
 

3 التعليقات:

chipie-chipounette a dit…

un des moments les plus difficiles pour moi c'est quand je vais te commenter... je ne sais que dire mon ami à part merci et un big BRAVO (comme d'hab) mais un petit peu spécial cette fois parce que là tu t'es vraiment surpassé :)
bonne continuation mon ami et j'attends avec impatience ta prochaine note :)

bacchus a dit…

@chipie-chipounette

Là je ne sais quoi dire. merci pour tout très chère amie.
ta citation ma chère.
.« L'amitié ne consiste pas seulement à voir les mêmes personnes régulièrement. C'est un engagement, une promesse, de la confiance,c'est être capable de se réjouir du bonheur de l'autre »

chipie-chipounette a dit…

bah voilà c'est pas pour rien que tu es Bacchus :)

Enregistrer un commentaire