mercredi 8 février 2012

وين ماشيين 19 قالو ثورة يا بو ڤلب


وين ماشيين؟
يا بو ڤلب.. قالو صارت ثورة في البلاد...
 قلنا صحا لينا يا بو ڤلب شاخت لعباد...
قالو اعتصام وقصبة وقبة يا بو ڤلب..
قلنا شبيه إذا تونس باش تكبر وآش نحب؟
قالو انتخابات حرة يا بو ڤلب
قلنا موش من عوايدنا لكن زعما كيما الغرب؟
قالو سياسة جديدة على ولادها حنينة والموعد تفرهيدة للعباد بعد الكرب
قلنا جو كبير يا بو ڤلب
وطلعو جماعة ويا مرحبا بولاد سيدي وظهرت عملة  بصبعي الأزرق ومن ألطاف الله موش بإيدي.. شدو المجلس والنهضة على المؤتمر تتدحنس والتكتل من أجل كرسي حمام يلحّس وصار جونا خرا في سيلوفان مقرطس... وبرا هكاكا يا بو ڤلب
واحد صلاحياتو معدومة في السياسة ظهر هاوي.. بطل الكرافات ولبس برنوس خراوي.. يظن الهوية مظاهر.. قصر وصحافة وتصاور.. يغضب من كلمة مؤقت واللي يشوفو في عجب الدنيا يبهت.. حاسب الرئاسة تفييس وبعد سب البوليس دورها تعصيص.. حتى صفر صلاحيات المهم يبقى رئيس... وين ماشيين يا بو ڤلب ؟
والحكومة تقول أنا كي لحمة الكرومة متاكلة ومذمومة.. ياخي ما تشوفوش اللي عندي الأغلبية والاشارات الالاهية والحلول السحرية لمشاكل الهوية.. كنا في الأحباس من أجلكم يا ناس.. الشغل موجود بإذنه المعبود قطر الفلوس رزم وليبيا توفر الخدم وجوكم عال العال هركة وقميص وسروال.
وفي التاسيسي التكتل من أجل الحريات والعمل قايد ينسّيكم في العهد البايد تصويت ودستور غير العادة والعوايد.
يا بو ڤلب بعد الثورة شفنا النجوم في عز القوايل.. هوما الحق واحنا الفصايل.. والفصالة من صفر فاصل حقنا ضايع وحظنا مايل يحبونا زوايل يا والله عميايل.. زعما هكا يعمل ديما اللي غلب.. غالط وإلا صحيح..؟ قلي يا بو ڤلب
قماش أكحل يسكر كلية.. قصان يد وساق اللي يسد ثنية.. الدوعاجي عندهم تجمع.. والشابي من أجل إرادة الحياة يلزمو يبلع.. حطة سياسية هاذي وإلا حكم مرقع؟ قلي يا بو ڤلب
يا بو ڤلب: ثورتنا طلع عملها القرضاوي.. ترأسها صاحب الملاوي جوها نهضاوي ورئيس المجلس تقول فداوي.. ملاّ حوال وملاّ عجب شيء كبير يابوڤلب.
وفي النهاية يلزم كيف التعبير وعهد التغيير نرجع فارح مسرور لأني تونسي مشهور.. مادام رضينا أمريكا وقطر اللي خلاتنا تفريكا وثورتنا شيكا بيكا.. شوف وين وصل الضرب ووين ماشيين يا بو ڤلب ؟                   

2 التعليقات:

Samia Lamine a dit…

راني فديت و مالغلبة عرقي سايل... الكل على الدم راكب وكل من هب و دب على الثورة يتحايل... و يا بو " قلب "حقنا ضايع وحظنا مايل...

bacchus a dit…

@Samia Lamine
شكرا سامية على التواصل ووين ماشيين يا أم ڤلب؟ هههههه

Enregistrer un commentaire