وين ماشيين18

وين ماشيين 18

مرحبا بيك.. أيها القارئ واعذر غضبي

منين نبدا؟ البنوك اللي قريب تعلن إفلاسها؟ البنك المركزي بعد ما سي الزكراوي أهدى صبع الوسط للمتظاهرين ذات ثورة؟ للبنك المركزي اللي يحب يكون سلطان زمانو موش معترف بالحكومة؟ واشكون هي الحكومة؟ عندنا كمشة بن عليين وطرابلسية جدد ممكن. زعمة نبدا من إضراب معمل الخميرة والبلاد خامرة ومخمورة آه يا خموري... نبدا بالتوانسة اللي قالولهم نهار الخميس ما ثماش خبز على خاطر الخبازة مضربين وقريب تطيح الأرواح.. سامحوني نسيت انو شعب قال:"خبز وماء..." صحيح الماء زادو في أسعارو وقالو تعديل بالطبيعة تعديل في أسعار الأوناس وبلادي صارت مجاري... زعمة نبدا من إضرابات القطاعات الحيوية في البلاد وكل واحد حاسب روحو الشنفرى وإلا عروة بن الورد وتأبّط شرا فقطع الطروقات وعطل المصالح؟ نبدا من حدودنا المهددة؟ نبدا من ثورة كل واحد يحب يحلب حتى حَلبوهالنا؟ نبدا من اللي يحب يخدم توة وحزب توة رايح فيها؟ نبدا من الشركات الأجنبية الفاصعة من البلاد واحنا نقولو الثورة صابة؟ نبدا من التوانسة قدام باردو يفرق بينهم طريق وتجمع بينهم حرب واحد يضرب على النقاب ومضرب على مجلة الأحوال الشخصية؟ واللي قدامو يضرب على الحرية ومكاسب المرأة وتصحيح المسار؟ نبدا من اللي يحب يحرر فلسطين وهو يتسبب في غلق الكليات يعني ماشي يحرر فلسطين بالجهل؟ نبدا من اللي انهزم في الانتخابات وإلا اللي زعمة انتصر حاسب روحو الكل في الكل ونقولها على مسؤوليتي كلهم راضعين الحليب مع بن علي فالسلطة والكرسي هو الكل في الكل كيما قال المغني أنت الكل في الكل؟ نبدا من المعتصمين في باردو المطر والبرد والمرض والكلام الخايب اللي يسمعو فيه على خاطرهم ما بلعوش الحربوشة متاع اللي زعمة منتصرين؟ نبدا من حركة تحب تربح الطرح من الفرشة الأولى كيما في لعبة الرامي؟ نبدا من البلاد البالعة ويحبوها مبلعة جلغتها؟ نبدا من تواطئ الصديق مع الصديق وهوما كيما الثعلب في لباس الزاهدين المتعففين؟ شنوة الفرق بين كليلة ودمنة في حكايات ابن المقفع واحد يغدر والآخر ساكت على غدرو؟ نبدا من مجلس قالو تأسيسي وإذا بيه للثورة تهديمي؟ نبدا من قنوات تلفزية غير قادرة إلا على صناعة الفارينة بالعربية الطحين لأنها تحولت من 7 إلى 6 (رقم الخلافة الجديد) وحذفت من البنفسجي الأحمر علم البلاد واحتفظت بالأزرق اللون المنتصر زعمة زعمة؟ نبدا من اللي هزو الشعب فوق أكتافو فقرر يبول على الشعب نهار اللي وجد كرسي في التأسيسي؟

منين نبدا؟ ومنين نبدا؟ دمرتولنا حياتنا يا كمشة شيّاب أصابكم العجز الجنسي والسياسي وباش تقلو رجال وفحولة استعملتو أصابعكم وباش تقنعو قلتم إصبع أزرق ممكن يتعدّا... هذا دمّار أزرق يا مغتصبي حق الشباب.

منين باش نبدا موش عارف ولكن نقول وين ماشيين؟؟؟؟ وين ماشيين بالبلاد؟؟؟؟؟؟؟؟