mercredi 8 juin 2011

أمثال شعبية في زمن الهلوسة


  • سَبِّّقْ الخِير تَلْقى الخِير: قالها دغفة
  • هوَ يْغَنّي وجْنَاحُو يْـرُدْ عَـلِيهْ:  قالها واحد يحب الخير للبلاد
  • كان صَاحْبْـك عْسَل ما تَلّحْسُوشْ الكُل: وكان صاحبتك؟
  • ما يْحِس الجَمرة كان الِّي يعْفَسْ عليها.. : الشعب التونسي
  • كي سلُّومْ النصارى.. الطولْ والخسارة: كل رؤساء أمريكا
  • كي الزير المتّكّي... لا يضحّك ولا يبكّي...: سفيان بن حميدة
  • عزوزة... وشدت سارق: وزارة الداخلية
  • كي قنديل باب منارة ما يضوي كان على البراني: المعهد الوطني للتراث
  • كانت تشخر زادت بف: قالها معطل عن العمل
  • الي يسرق يغلب الي يحاحي: لجنة تقصي الحقائق
  • خوذ العلم من روس الفكارن: بعض صحافيي ما بعد الثورة
  • راس الفرطاس قريب لربي: قالها نجيب الشابي
  • ربي يعرف ميمونة وميمونة تعرف ربي: الراقصة نورس بعد ارتدائها الحجاب
  • الصحبة صحبة والنية ما فماش: جماعة 18أكتوبر وما بعده مع مراعاة الفارق في التاريخ
  • كان البومة فيها الخير ما تفلّت فيها الصيادة: مسكين الشعب التونسي في حين البوم رمز الحكمة في الثقافة الغربية
  • بوسعدية خايف من الكلب والكلب خايف من بو سعدية: وضع تونس الآن
  • ذيل الكلب حطوه 100 سنة في قصبة طلع أعوج : شلاكة تجمعي
  • لا يعجبك نوار دفلة في الواد عامل ضلايل ولا يعجبك زين طفلة حتى تشوف الفعايل.: الوعود الانتخابية
  • جاء يعاون فيه على قبر بوه هربلو بالفاس: لجنة الانتخابات
  • ماذا كليتى لوح يا براكة: البنك المركزي
  • الزغاريد أكثر من الكسكسي: الثورة
  • ميطوّل ربي كان في عمر الكلاب وطاس الخرا عمرو ما يتكسر : حكام العرب
  • اللي تلموا النمالة في عام ياكلو الجمل في فم: النمالة هو الشعب والجمل هو هو ما تغيرش
  • ماتاخوش كلام الي يضحكك خوذ كلام الي يبكيك: قالتها متراك متاع بوليس وزادتها كان عجبك
  • إذا فاتك الكلام قول سمعت واذا فاتك الطعام قول شبعت: واحد على الفايسبوك ديما يسأل شنوة ثمة جديد
  • حافظ الستين (حزب) ويسب في الدين : شكون زعمة؟
  • النفس نفس ملوك والحالة حالة كوازي: مراقب للوضع
  • الحر من غمزة والبهيم بالهمزة : مثل تونسي
  • يا ويل الي ماعندو والي يعيط للكلب خالي : أذناب التجمع
  • رجعت حليمة لعادتها القديمة : التلفزة التونسية
  • الرحمة خاصة والصخطة عامة : لمن يريد أن يفهم
  • رضينا بالهم والهم مارضاش بينا : الطقس هالأيام
  • صلاة القياد جمعة وعياد : وبقية الأيام؟
  • جاي يتبع في مشيت الحمام تلف مشيتو: السبسي يقلد في بورقيبة
  • حج وزمزم وجا للبلى متحزم : واللي حج لندن؟
  • جاي يعاون فيه على قبر بوه هربلو بالفاس: الحكومة المؤقتة
  • علموه الصلاة سبقهم للجامع : الثورجيون الجدد
  • القمح يدور ويجي فقلب الرحى: قاله المسؤول عن الجباية الفيسك بالعربي
  • عريان الترمة وفي صبعو خاتم: حزب صغير
  • الجنازة حامية والميت كلب والله ينجينا من الوقت الكاسد والجار الحاسد والضنى الفاسد على خاطر المخنوقة ضحكت على المذبوحة ياخي المصموطة ماتت بالضحك: قالها مدون وأضاف: ما تلقى في الزفت كان ترتيبو صباطو مقرط بحبل ومسكة في جيبو



8 التعليقات:

الحلاج الكافي a dit…

هايلة ها التدوينة المعجم للأمثال الشعبيةاللي قريبه للواقع اليومي المعاش ...و اللي فيه برشة مرارة و خيبة...رغم الأمل اللي اللي ما زال قايم...
حبيت نزيدهم فقط مثال كان يقول الولد الله يرحمو :
الله يفكْنا من العْكومة و اللّي شاهي حْكومة
*العكومة هو جلد الشاة القديم و اليابس و الفاسد و الذي لا يصلح لشيء
و أطن أن العكوهة عو راشد الغنوشي و اللي شاهي حكومة هو نجيب الشابي...و الله أعلم

bacchus a dit…

@Al-Hallège
حلو المثل اللي أضفتو
شكرا صديقي العزيز
والأحلى الله أعلم
رشيق في تعليقاتك كما عهدتك صديقي

marwen a dit…

ممتاز لكن وين إلي يفهم

bacchus a dit…

@marwen
برافو مروان
المشكلة كلها لخصتها أنت
وين اللي يفهم
شكرا على التواصل

lioneltn a dit…

يرحم بوك في هل التدوينة ...
إنجم نهز شويا منها للفايسبوك ؟

bacchus a dit…

@lioneltn
شكرا على التواصل
طبعا ممكن تهز للفايس بوك
على كل ستنشر كلها بصحيفة الأولى كما أخبرني الصديق وسام التليلي

brastos a dit…

ما ينقر عين الفلّوس كان خوه : المتلوّي

bacchus a dit…

@brastos
نعم ويا خسارة ولكنّ القادم أرحم
سياتي حين من الدهر يكون ما يجب أن يكون
الثورة الفرنسية قضت15عاما من التناحر قبل أن تكون الثورة الفرنسية التي نعرفها اليوم
سنكون بعدد أقل من سنواتهم
ستكون ثورة تونس ربيع ثورات العالم صديقي
لنا الأمل والمستقبل لا عليك

Enregistrer un commentaire