jeudi 29 avril 2010

وين ماشيين10


 وين ماشيين10


    قرّرت أ تي إي انتداب موظف باش يسهر على نقاء الفضاء الافتراضي ويفيق بالتجاوزات التي من شأنها تعكير صفو الجو العام... فتقدّم عمر وعميرة والعمري وعامر وعمارة وعمرو (موش خالد) والمعموري ومعمر كلهم تقدمو للوظيفة. وفي جو كلو هيبة وقار دخلو باش يعملو الامتحان يدفعهم الوفاء الدائم وكلهم شعور بنبل المهمة وجسامة المسؤولية التاريخية الملقاة على عاتق من سينال شرف الوظيفة. كان السؤال: لو نهار أو ليل وقع صنصرة موقع أو مدونة أو منتدى أو صحيفة أو مجلة لا قدّر الله قلنا لو لأنو هذا ضد قيمنا السمحاء ورؤيتنا الشمولية وفي كنف الشفافية والوضوح كنت مجبر باش تفسر سبب الحجب فماذا تقول؟
وبداو العمامير يجاوبو اللي قال الحجب من أجل بث الفتنة واللي قال الإرهاب واللي قال الأفكار الهدامة واللي قال المس من المناخ الديمقراطي واللي قال الثلب واللي قال واللي قال والعمامير جايبين ما عندهم. هوما هكة ودخل سخش موش شخص في يدو طبق فيه قهاوي للجنة تقييم الاختبار وبدا يبتسم وهو يسمع في الإجابات. غضب رئيس اللجنة وقالو:
رئيس اللجنة: شنوة اللي يضحك فيك أنت؟
السخش: حتى شيء
رئيس اللجنة: قول وإلا نحولك للتحقيق
السخش: علاش سيدي شي ما عملت
رئيس اللجنة: قتلك علاش تضحك؟
السخش: ناس عندها شهايد وما تعرفش تحكي
رئيس اللجنة: شنوة؟
السخش: تو بربي هذا كلام قالو فتنة وإرهاب ومناخ ديمقراطي وثلب وحكايات سامحني بيدونة
رئيس اللجنة: نورنا سيادتك لو كنت أنت شنوة تقول؟
السخش: أنا نقول علاش وقعت صنصرة البلوغات؟ على خاطر وقت امتحانات يعني نحبوكم تنجحو وتنقصو من الكهرباء في إطار ترشيد استهلاك الطاقة وتنقصو مالسهريات صحتكم تهمنا وتنقصو من القعاد قدام الكمبيوتر نخافو على عنيكم واحنا نحبوكم تسيبو العالم الافتراضي وترجعو للجلسات العائلية، شوية قلوب واتحلقو حول تونس7 باش ترفعو شوية من مستوى التخلف اللي وصلتولو  بعد ما السموم اللي ضربتكم بسبب اليوتوب وجماعتو تي ريحو عصابكم من النقاشات الفارغة اللي تعملو فيها والتعليقات والنرفزة متاع أخبار توصلكم وكلها اصطياد في الماء العكر وتسميم أجواءنا اللي كلها طقس جميل وعصافير تزقزق هاذي بعض الدوافع وكيما تشوفو نبيلة والعمامير ليكم رحمة. وملآخر ما نقول شيء اللي عجبو عجبو واللي ما عجبوش ..... يخي شكون الهوكش متاع الشهايد هاذم باش نضيع وقتي ونجاوبهم؟
وبهت الذي كفر وقال رئيس اللجنة: شنوة اسمك ولدي وشنوة تعمل في الدنيا؟
السخش: اسمي عمّار سيدي في القراية شوية شوية أهوكا نطيب القهوة وعندي جلم ماضي لوقت الحاجة وعندي 404 باشي ندبر بها في راسي
رئيس اللجنة: صحيت ولدي قررنا نحن رئيس اللجنة تعيينك أنت والجلم والباشي 404متاعك في الوظيفة وآهو كلو عمار يا عمّار
قالو العمامير لخرين الوباء والخلاء هذا خلاء مخلي
رئيس اللجنة: قررنا نعينوكم معاه لكنو رئيسكم والناطق الرسمي
عمّار قالهم: لا أنا عمارموش خلاء
قال كرسي لطاولة بجنبو: هذا خلاء موش اعمار والخلاء في العربية الفصحى التوالات في الهواء الطلق
ومن نهارتها تأسست امبراطورية العماميير.

10 التعليقات:

Anonyme a dit…

wonderful! bravo

Azwaw a dit…

أصبت و في القول ما قللت وما أطنبت و خير الكلام ما قل ودل

bacchus a dit…

@Anonyme
Thank You Very Much

bacchus a dit…

@أزواو سو منديل أوراغ
سعيد بتعليقك أزواو والقهر يا صديقي غبن ودمّار ودمار
مرحبا بك

WALLADA a dit…

أما هدرة فيه هالسخش ههههه يطلع منّه

bacchus a dit…

@WALLADA
الحياة أشرف من أن تعتبره شخصا
فمن الناس من إذا شبّهتهم بالحيوان أهنت الحيوان كما قال ميخائيل نعيمة الحيوان أرقى من مثل هالسخش

Primavera a dit…

looool moch normaaaaal trop bien fait bravooo !

bacchus a dit…

@Primavera
مرحبا بيك وشكرا صديقتي

taxe a dit…

Bacchus Merci beaucoup, ca m'a fait de la peine de voir les blogs censurés un à un. Hak 3abbart fi bélasit ceux qui ne peuvent pas.La censure n'est pas la solution. Wi Jélam lézim yahffa.

bacchus a dit…

@taxe
هذا واجب أقوم به ولا أستحق عليه شكرا
الجلم لازم يحفى حكمة جميلة
taxe
شكرا على التواصل والتفاعل

Enregistrer un commentaire