samedi 12 octobre 2013

وين ماشيين31؟

     وين ماشيين 31




       الشوارع مليانة.. عياط وزياط.. اللي يبيع في سكينة واللي يبيع في قرضة واللي يبيع في شقالة واللي يبيع في معلاق واللي يبيع في ملقاط نار واللي يبيع في كانون واللي يبيع في مبرد واللي يبيع في البخور.. واللي يبيع في الريق البارد يسأل على الأسعار وما يشريش.. واللي يتفرج فمو ساكت.. واللي داهش واللي هابش واللي ينابش واللي مالأسعار عاكش.. واللي ينبر واللي على الزمان يتقهّر واللي بقطوس اسباني يتفخّر.. واللي في دغفة يسرقو يڤاطر فرحة عيد براكاج بلا سواطر.. واللي يكابر في 100فرنك ماخذة بالخاطر.. والكبير والصغير واللي يدبي على الحصير والمرخوف والمكبوس والمتواضع واللي عامل لروحو ناموس الكل في الشوارع تتطلفح وما تبكي كان على الفلوس.

       السلق والبصل والمعدنوس في الأسوام سلطان.. يخي يجي عيد من غير عصبان؟ غمزهم التفاح والبنان والعنب والرمان يجي وقتنا وتو نشوفو شكون أغلا وقت الشريان.. حضبة ولمّة ودزّان ..  نساء ورجال.. حمص وزبيب.. المتربي والخليقة والباهي والخايب والسمبا والبليد شبيك راهو عيد.. واللي يدحنس واللي في العرق يتنفس واللي لاصق وحدة عامل فيها يبزنس تكبلو سعدو لصقها برشا ما عجبهاش تحمملو وعدو.. تقول في الكار الصفرة موش مرشي خضرة.

       والبطاحي.... العلوش فوق الڤرط مفروش.. سلطان زمانو غليت اثمانو عايش في غيوانو من بهامة بعض البشر اخوانو الزوز ضحية عيد الكوليستيرول والڤازوز.. العلوش راس يتشوشط وبشر ماللي دفعو راسو مبوّط واللي يقول العربي خير بلليّة والشحم واللي يقول الغربي خير كلو لحم واللي يقول سيب عليك مالاسباني جلد وعظم واللي دايخ واللي حاير واللي دافع قرابة المليون ومتغشش من دينارات أجرة الكميون.. واللي بلّم قدّام الأسوام لقى جيبو ضايع قال شنوة هذا؟ ناخذ العلوش قطايع لحم ودوارة وراس أرخصلي ونتخيلهم ركبو علوش كامل في الدار ونربح أقلّهم حق الجزار.. واللي يفكر في القديد واللي يفكر يجيه هدية كتف نهار العيد واللي خانتو الشهرية يفكر ينقص من حق الشراب متحسر باش يشري الضحيّة ويسب.. غلاّو الشيخة عليّ.. واللي يسأل وين صلاة العيد يحب يكون سابق.. بلاصتو وراء الامام.. خذا علوشو تكّاه في المال متاع البي آم.. واللي مع راجلها قالت حتى علوش صغير فيه البركة متلتلة علينا الديون واللي قالت نحبو موهر شنوة يقولو علينا الجيران كي يشوفوه قطوس في البركون.. واللي يثبت في فم العلوش تقول طبيب سنون واللي حالف مايخاذو كان بالڤرون.. واللي تقول نعيدو مع دارنا وإلا داركم نهار ويتعدى وملاّ وحلة ملاّ ورطة ملاّ فدّة.. واللي يسمسر واللي يمكّس واللي على الرخيص يفركس وموش لاقي.. يخرج والراس منكس.

       هذا فرحة وإلا ترحة.. إبراهيم علوشو نزل مالسماء والناس طلع على جثتها البلاء راهي سُنة يا يا يا (مومنين) ووين؟ وين ماشيين؟؟؟      
   

6 التعليقات:

Anonyme a dit…

امممممم ....هده نقشة استثنائية
نص حلو و مزيلن و فيه حرفية الوصف الدقيق
هذا نص وثيقة على حالة التونسي التعبان بين بين العلوش و العصباااان

احترامي للوحة المرسزمة التي لا يقدر اي تعليق مجراة نسقها

الحلاج

bacchus a dit…

@الحلاج
شكرا صديقي على عبارات التشجيع
شكرا لأنك أفهمتني أني لم أكن متطرفا في نظرتي إلى الأمور
شكرا لأنك صديقي الرائع المبدع

brastos a dit…

هاذا الكل خلى المعنى الحقيقي للتضحية يضيع في تفاصيل لا معنى لها انتبهت اليها كاميرا باخوس العظيم

bacchus a dit…

@brastos
يا مرحبا بالفنان كأسا أرفعها على نخبك

bouallegue taieb a dit…

لا يأتي هذا العمل الجميل إلا باخوس الجميل . عليك أن تسجّل هذا النص صوتيا يا صديقي وبصوتك . ما رأيك ؟ ;) . دام ألق حرفك ولا جفَّ المداد

bacchus a dit…

وهل يفتى وطيّب الغالي موجود. سأسجله بصوتك المعبّر وهذا من دواعي شرفي صديقي الغالي

Enregistrer un commentaire