وين ماشيين 12

            

     البلية

    قالك الدنيا هاذي كل واحد باش مبلي.. مثلا واحد مبلي بلسانو ما يسكتش يقول للصحيح صحيح وللغالط غالط حسب فهمو للمسائل.. يقوملو واحد مبلي بيديه، نهار كامل في يدو جلم يقص على كلام العسل والبصل من غير تثبيت في الصالح والطالح وقت يقولو ليه سيب صالح يغضب ويحلف بالحرام ما يسيب حد لا من سلم ولا من كفر ولا من قرّا ولا من ورّى ولا من كان على حق ولا من كان على باطل هكة تنجم تقول هواية.. وإلاّ طريقة باش يثبت الرجولية متاعو.. ما هو كل واحد رجوليتو وين جات.

      قالك زادة ثمة اللي مبلي بالأرقام تلقاه النهار كامل وهو غارق في الإحصائيات والمعادلات وسبحان ربي الأرقام اللي يجيبها ديما تترجم مستوى لا قبلو ولا بعدو من النبوغ والتطور حتى صرت نشك في الرياضيات. شبيك أنت راهو شيء كبير حارو فيه أكبر المتخصصين في المعادلات الرياضية اللي إيكس ساعات تساوي صفر عندهم أمّا هو أبدا الإيكس متاعو ديما في الليكس. بالطبيعة ثمة كونتر أكسمبل ولكن الأرقام هاذيكا متعفنة في الماء العكر واحنا عزايز والماء يمكن يهز العزوزة وهي تقول العام هههههه

     قالك ثمة اللي مبلي بنظافة البيئة تلقاه ما يشوف في غيرو كان على صورة ساشيات كحل وهكا تهزو النخوة للقفة وتراه يحارب اللي ما يهزهاش وشعارو هزو البنادر يا .... مع الاعتذار لجماعة الحضرة راهو البنادر المقصودة غير بنادرهم لأن البنادر المقصودة غرابل تسقط في الفارينة.

وقالك ثمة اللي مبلي بالحرية والتحرر والعياذ بالله وساعات يزيد يطالب بحقو ربي يحفظنا وهاذي مشكلة المشاكل.. قالك شنوة عاملين فيها فاهمين ومتثقفين وكلام كبير يعني مختصر العبارة هوكش لا أرقام ولا قفة ولا بندير ولا فارينة تو بربي موش عيب عليهم وأنا من رايي حلال فيهم الجلم لأنّهم عاملين عارفين وهوما ما عندهمش المستوى الأدنى باش يفهمو رمزية الأرقام لذا يلزم صنصرتهم حتى يفهمو أنو الفضاء الرقمي يعني الأرقام اللي تتنشر وما يعنيش رقمي في مواجهة رقمك وفكرتي قي مواجهة فكرتك فيا عباد بربي فكرو من جديد راهو رقمي يعني الرقم متاعي وما عندو حتى علاقة بتكنولوجيا الاعلامية.

     أي نخليكم وكل سبت وأنا نخلوض ونهز ونصبط نهز من الثلاجة ونصب في الكاس.