jeudi 24 octobre 2013

فدّيت



 

فدّيت.
      
         فِد..ابكي.. اشكي.. فلڤت.. طير.. نڤز.. كرّز.. عيّط.. صيح.. اتنرفز..
تصاور دموع.. قطرات دم.. كاريكاتير متاع الخراء.. وصف البلاء.. الخلا والصفا.. فيديوات تُدين.. حقائق وتكمبين.. أغاني الشيخ.. ستاتيات وأقوال.. درويش وموسيقى مرسال.. وجو جماعة الفايسبوك هبال.. 

       آخر أكتوبر.. بداية نوفمبر.. التونسي يقلك فديت والبلاد على كف عفريت.. نهضة مكبشة في السلطة.. ومعارضة معفطة.. ونخبة حاسبة روحها مقطرّة.. نتائجها مصفّرة.. قدّام الوضع مبڤرّة.. فالحة تتحزم بالأعلام.. تصاور وشوية أفلام.. والهم زايد على قدّام.. يا عيني على الوطنية.. تتلخص في ديڤاج وريق كائنات فايسبوكية.. هكا يدافعوا على القضيّة واللي بيدهم الأمر مخليين تونس في الخلاء مخلية..  كل واحد خايف على بدنو كمل هكا تو تجيبو الصيد من وذنو.

       علاه علاه صارت صفحات البعض صفحة البقاء لله..؟ وأوفياء.. أوفياء لدماء الشهداء.. تأبين وترهدين وتكمبين يكتب كلمتين ويمشي يرقد قرير العين وقد أدّى ما عليه للوطن من دين.. يظن أنو بات غالب موش مغلوب والزهر الراقد والسعد المكبوب.. علاه الريق والتزنديق والترونيق.. يا سكّر مرحاضك وإلا فيق..
علاش هكا تونس؟ تونس ما خانت حد.. من والد والد والد الولد.. تونس تقاسي في حب أولادها العايقين تساسي.. تونس قريب تقول نشرب كاسي ونموت بحذا ناسي لا يقولو ساسية بنت ساسي.. تونس اللي رجعوها كراسي.. تونس اللي كانت تظن أنّ أولادها ينقذوها وقت تقول آه يا أولادي يا بناتي آه ياناسي.. تونس اللي حبّت الكل.. نهار اللي طاحت بها الدنيا برشا منها يديه غسل.. تونس وقت تغّلب على خضرتها سوادها تركوها برشا من أولادها.. تونس اللي مازال فيها من يحن للزين.. واللي بدل طحين بطحين.. واللي يفڤص لواحد عامل تاكم مطيّح السنّين.. واللي يقبض باش في بلاتو تلفزة يقول كلمتين.. وكذّاب في جريدة.. واللي يبشر بثقافة جديدة.. واللي شيحو الزمان كالقديدة.. حركة وحزب ونقابة.. حاسبين الشعب أموسابيان في غابة.. وقالك حوار وندّابة.. منكم الهم صابة.. سرّاق ومنافقين ونصّابة.. 

       منحبش البوليس كي يظلم لكن مانرضاش يقتلو الارهاب.. منحبش يعدموه بخبثهم الشيّاب.. ثورة شباب قالو واللي قاعدين يموتوا يا سي الحاكم يا سي الشباب؟.. موش ولاد تونس اللي ربّاتنا وتربينا فيها..؟ أنت يا سي اللي تحكم وقاعد تخليها.. شنوة ذنب أولادنا من الأمن يا يا يا مع الأسف حاميها.. واشكون ينقذ تونس وقت حاميها حراميها؟
       موش معترف بحوار ولا توافقات ولا أحزاب.. موش معترف بكمشة الشيّاب.. لازم ترجع ثورة الشباب لازم نخرج من حلقة الجنازات والتفجيرات والاغتيالات واللي عاملين فيها في السياسة بارونات.. 

       موش عارف الليلة قاعد نخنتب وإلا نكتب وإلا نندب وإلا كاس المرار نشرب.. اللي نعرف حاجة وحدة حقّي اللي كان ضايع جابو الشارع.. وأنا راجع للشارع.. باش نرجع حقي الضايع ونحاسب اللي خلّى دم التونسي بزايع.. 

       ليذهب إلى الجحيم القومي والخوانجي والعلماني والمڤّوش واللي على مصلحتو يبربش.. ليذهب إلى الجحيم اللي السلطة على طبق ذهب جاتو.. واللي لحق قطار الثورجية بعد ما فاتو..  مانيش أحسن ماللي ماتوا واللي على تونس باع حياتو.. 

       مانيش أفضل ماللي على تونس باع حياتو.  



samedi 12 octobre 2013

وين ماشيين31؟

     وين ماشيين 31




       الشوارع مليانة.. عياط وزياط.. اللي يبيع في سكينة واللي يبيع في قرضة واللي يبيع في شقالة واللي يبيع في معلاق واللي يبيع في ملقاط نار واللي يبيع في كانون واللي يبيع في مبرد واللي يبيع في البخور.. واللي يبيع في الريق البارد يسأل على الأسعار وما يشريش.. واللي يتفرج فمو ساكت.. واللي داهش واللي هابش واللي ينابش واللي مالأسعار عاكش.. واللي ينبر واللي على الزمان يتقهّر واللي بقطوس اسباني يتفخّر.. واللي في دغفة يسرقو يڤاطر فرحة عيد براكاج بلا سواطر.. واللي يكابر في 100فرنك ماخذة بالخاطر.. والكبير والصغير واللي يدبي على الحصير والمرخوف والمكبوس والمتواضع واللي عامل لروحو ناموس الكل في الشوارع تتطلفح وما تبكي كان على الفلوس.

       السلق والبصل والمعدنوس في الأسوام سلطان.. يخي يجي عيد من غير عصبان؟ غمزهم التفاح والبنان والعنب والرمان يجي وقتنا وتو نشوفو شكون أغلا وقت الشريان.. حضبة ولمّة ودزّان ..  نساء ورجال.. حمص وزبيب.. المتربي والخليقة والباهي والخايب والسمبا والبليد شبيك راهو عيد.. واللي يدحنس واللي في العرق يتنفس واللي لاصق وحدة عامل فيها يبزنس تكبلو سعدو لصقها برشا ما عجبهاش تحمملو وعدو.. تقول في الكار الصفرة موش مرشي خضرة.

       والبطاحي.... العلوش فوق الڤرط مفروش.. سلطان زمانو غليت اثمانو عايش في غيوانو من بهامة بعض البشر اخوانو الزوز ضحية عيد الكوليستيرول والڤازوز.. العلوش راس يتشوشط وبشر ماللي دفعو راسو مبوّط واللي يقول العربي خير بلليّة والشحم واللي يقول الغربي خير كلو لحم واللي يقول سيب عليك مالاسباني جلد وعظم واللي دايخ واللي حاير واللي دافع قرابة المليون ومتغشش من دينارات أجرة الكميون.. واللي بلّم قدّام الأسوام لقى جيبو ضايع قال شنوة هذا؟ ناخذ العلوش قطايع لحم ودوارة وراس أرخصلي ونتخيلهم ركبو علوش كامل في الدار ونربح أقلّهم حق الجزار.. واللي يفكر في القديد واللي يفكر يجيه هدية كتف نهار العيد واللي خانتو الشهرية يفكر ينقص من حق الشراب متحسر باش يشري الضحيّة ويسب.. غلاّو الشيخة عليّ.. واللي يسأل وين صلاة العيد يحب يكون سابق.. بلاصتو وراء الامام.. خذا علوشو تكّاه في المال متاع البي آم.. واللي مع راجلها قالت حتى علوش صغير فيه البركة متلتلة علينا الديون واللي قالت نحبو موهر شنوة يقولو علينا الجيران كي يشوفوه قطوس في البركون.. واللي يثبت في فم العلوش تقول طبيب سنون واللي حالف مايخاذو كان بالڤرون.. واللي تقول نعيدو مع دارنا وإلا داركم نهار ويتعدى وملاّ وحلة ملاّ ورطة ملاّ فدّة.. واللي يسمسر واللي يمكّس واللي على الرخيص يفركس وموش لاقي.. يخرج والراس منكس.

       هذا فرحة وإلا ترحة.. إبراهيم علوشو نزل مالسماء والناس طلع على جثتها البلاء راهي سُنة يا يا يا (مومنين) ووين؟ وين ماشيين؟؟؟